劉穎鏇另類安全措施拍爆破 遭陳山聰取笑：好明顯係膠膠地

由馬國明、唐詩詠、陳山聰和劉穎鏇（Tiffany）演出的TVB新劇《隱形戰隊》目前拍攝得如火如荼，今日監製Jazz在IG貼了一段短片，見到穿上小背心的Tiffany，將牛皮膠紙貼滿了雙肩、手臂及腰間位置，Jazz忍不住問：「請問發生乜嘢事？」Tiffany認真地說：「安全措施，爆玻璃好危險，幾好！」

接着鏡頭一轉，Jazz又走去問山聰：「你嘅對手發生乜嘢事？」山聰抵死地說：「好明顯喇，膠膠地！」不過拍完爆玻璃場面後，Tiffany真正知道甚麼叫「苦過弟弟」，因為搣膠紙的過程相當痛苦，要動用兩位工作人員慢慢「搣落嚟」，因為膠紙貼住她的真頭髮，搞到Tiffany叫苦連天並說：「我下次都係唔要呢啲免費脫毛啦！嘩！真係有啲真頭髮喺度㗎！我啲BB hair呀！」