唐詩詠被彈「太瘦唔夠高」難做主角 認任性咬緊牙關喊住行落去

馬德鐘、唐詩詠、王君馨、關禮傑、簡淑兒等今日在葵芳為TVB劇集《我家無難事》宣傳，馬德鐘指劇集進入結局篇，大家要留意他能否與老婆重修舊好，劇情將會有好多波折，一定有驚喜。

唐詩詠透露早前出席一個講座分享演戲心得，最深刻現場有個女孩子好鍾意演戲，但參與多次試鏡也失敗，她鼓勵對方要堅持，還可以學演戲增值。她以過來人說：「呢條路係好辛苦，一路行會被人拒絕，聽到有人話自己唔得，太瘦、唔夠高做唔到主角，無論人哋點講，最緊要自己係咪好鍾意演戲，鍾意就要咬緊牙關，喊住行落去。」她自認任性，愈被人看不起，愈要爭氣繼續行落去。

馬德鐘也曾被人拒絕過，但堅持不放棄，他說：「以前試過拍鬼片，拍咗兩日就被導演換走，當然唔開心，難得接近係男主角，戲份較重。但當時自己比較新，會反省邊方面做得唔夠好，所換嘅演員都好堅，所以我從來冇講。」他覺得經歷令自己行出人生路向，勉勵同學被人拒絕不緊要，只要有一次機會，好好把握便會成功。說到現時他證明自己演戲得，他笑笑口說：「仍須努力，希望有機會同呢位導演再合作。」