張繼聰要囡囡講6次「多謝大爺」 自認好衰：依家大個玩唔到

小朋友天真爛漫，好多時被大人整蠱都唔知，但亦係最得意可愛之處。張繼聰今日就喺社交網上載一條以糖果引誘囡囡張靖（Kakaball）「就範」嘅短片，一直要個女同自己講：「多謝大爺」，足足連講6次都未夠，張繼聰之後更不斷提出新要求，又要阿女邊講邊拱手作揖，又要阿女笑，又要阿女扮嬲，最後仲要嘟埋嘴仔；最後有一把張繼聰之外嘅「正義男」聲話：「你唔好搞佢啦，你畀就畀唔畀就算啦。」睇怕張繼聰都唔知仲要提出幾多要求，先肯畀一粒糖個女。

囡囡似乎都習慣咗被爸爸整蠱，總之目的達到，拎完粒糖就頭也不回，拜拜你條尾。不過，呢段片望落似係張靖歲幾、兩歲時拍攝，依家囡囡已經4歲，應該冇咁容易玩到，難怪張繼聰留言話：「依個老豆真係衰。冇囉，依家大個咗啲，玩佢唔倒（到）嚕。不過重點係片尾，妹妹攞咗粒糖之後，即閃。」