區瑞強開騷唱70年代中台歌肥媽黑妹被改名「湯羹姊妹花」

2021-10-04 18:30

區瑞強將於本月15日在伊館舉行一連三場《區瑞強相識在童年知心50載演唱會》，今日他與嘉賓黑妹（李麗霞）和肥媽為演唱會進行綵排。

區瑞強表示今次演唱會將大唱70年代的經典中文及台式歌，當年台灣歌紅霸香港，好多觀眾聽到也會琅琅上口。他又搞笑指為肥媽和黑妹（李麗霞）改名為「湯羹姊妹花」，因為夠晒闊。肥媽聞言即大讚：「個名好掂，可以登台用！」

對於在演唱會上與魔術師兼大學師弟甄澤權合作玩魔術，問到可會找肥媽和黑妹幫手上演刀鋸美人，他說：「驚把鋸鋸爛，鋸好耐都未得！鋸一個都可以，兩個的話魔術師都驚，我試下提議下。」肥媽笑言謂：「冇嘢做呀？無啦啦畀人玩，我哋好守身如玉㗎！」黑妹亦表示肥媽敢去就一齊玩。區瑞強表示嘉賓方面最擔心肥媽和胡楓，皆因經常爆肚，最驚搞到超時而被罰錢，又大讚另一嘉賓李思捷既講得、唱得又扮得嘢。