AL AK雙Anson鬥肌半夜大晒巨胸加「底底」引死人

2021-09-30 06:30

MIRROR成員Lokman(楊樂文)、Anson Kong (江𤒹生)、Frankie(陳瑞輝)、Stanley(邱士縉)同Tiger(邱傲然)喺演唱會上show過肌，Ian(陳卓賢)都喺IG晒過半身照，人氣最勁嘅「教主」Anson Lo(盧瀚霆）及AK昨晚「夜媽媽」突然喺社交平台派「軍糧」引誘人，各自上載咗4張半裸上身爆肌相，只見兩人唔止有6嚿腹肌，上身肌肉線條明顯，展露骨肉均稱嘅完美Body，Fans仲難得見埋偶像條「底底」。

由於「教主」平日惜肉如金，大熱天時都着長褸現身，所以呢輯相惹嚟好大反應，令「神徒」進入瘋狂狀態。其中一張相冇着鞋襪嘅「教主」解開咗牛仔褲褲頭，拉住底褲邊，雙膝跪地，用迷人眼神望向鏡頭，性感誘人，另一張相就裝作扣褲鏈，大家又隨佢嘅動作將視線向下轉移至下身位置，真係睇到「神徒」流晒鼻血，令人想入非非殺死人呀！林欣彤及張嘉紋睇到嘩嘩聲；李靜儀(Heidi)及坤哥分別留咗冇眼睇及流口水emjoi；林二汶留言話「呢個堅係勁」；Serrini就話「很喜歡」；欣宜就話「我經已死了！」

至於AK比Anson Lo更大膽剝得更多，仲扯高前幅衫尾到下巴位置。最搞笑吳嘉禧(Cheronna)留言：「夜媽媽post埋啲咁嘅相，叫嬸嬸點瞓得著呀？」作為生粉嘅張嘉紋更睇到火都嚟埋，不滿男友林子傑，留言話：「𠵱家望住屋企嗰個，同你落差太大了！」、又有指「今晚生粉流鼻血成河SOS！」、「地拖唔該！」