祖兒剖白感情：最後無奈放低

　　(星島日報報道)昨天（29日）是容祖兒出道22周年的日子，她趁紀念日推出全新廣東歌《不配》，更別出心思於昨晚9時29分上架長達10分鐘的MV拍攝花絮。這次祖兒首次親自操刀執導MV，她選擇男女主角以現代舞方式去表達遺憾美，並以LED環幕拍攝，建造寒冷極地世界，提升藝術美感。

　　談到親自執導《不配》MV，祖兒表示：「一切都係嚟自我對呢首歌嘅感情，我好喜歡呢首歌嗰種無奈同成長嘅智慧，所以我諗，要搵一個好明白我對呢首歌嘅感情嘅人其實比較難，不如我自己做導演，去令呢首歌有一個我腦海裏面嘅影像出嚟。」祖兒亦坦言執導演筒要面對不少難題，以前自己被拍，今次要發出指令，告知攝影師、舞者如何呈現，要用不同鏡頭捕捉不同角度，要記住鏡頭距離和作用，難度不少。

　　雖說是祖兒「處女」執導，但有心水清歌迷提她其實在20年前她已曾經「執導」MV，其時更找來吳彥祖任男主角。祖兒笑言：「嗰時參加商台活動拍一首《何苦》，不過比較玩票形式，今次係認真嘅一次。與其話執導，不如話我用多個身分將呢首歌想表達嘅情緒完整咁呈現出嚟，令聽眾、樂迷更加明白我想唱乜。」首次擔任導演，為令過程更流暢，祖兒選擇男女主角以現代舞的方式去完成這一次關於遺憾美的表達，「全部都好優美，因為每個動作其實都係根據返歌詞的起承轉合，同埋嗰種好努力但最後都無奈要放低，嗰個感情我都覺得好動人。」

　　為提升故事意境的藝術美感，MV採用LED環幕拍攝，建造寒冷凜冽的極地世界。祖兒親自解構：「氣氛上係令到我覺得好震撼！喺一個極寒、極嚴峻環境裏面，兩個人靠對方的體溫互相取暖、去俾大家嘅愛，呢一份感覺我覺得好配合呢首歌。大家都曾經好努力去令到呢一份感情行落去，就係因為大家努力過，所以更加唔捨得。」問到歌曲是否親身經歷？祖兒表示：「你話冇經歷過都好難說服到自己，我相信一百個人聽呢首歌都有一百種對號入座方法。愛情更多嘅唔係同唔同到對方行到去最後，其實係令對方成長，更加清楚自己係一個需要乜嘢嘅人。雖然唔能夠一齊，但可以互相祝福，希望大家仍然活得快樂，我覺得係一個成熟嘅相處。」

　　入行22年，祖兒感觸甚深稱：「其實要堅持22年真係唔容易嘅事，呢22年入面繼續遵守自己諾言、繼續成長，好多謝身邊每一個幫助我嘅人、我嘅歌迷、我屋企人。我成日都會覺得用自己嘅作品去代替自己想講嘅所有說話，希望將來每一日都可以比之前進步，繼續做好啲自己，希望鍾意聽我唱歌嘅人仍然聽到我好用心演繹每一首歌。」

　　此外，經理人霍汶希於零時已發長文賀祖兒入行22年，坦言這日子對她和祖兒都非常特殊和重要，指過去的日子有太多的感動和值得銘記的瞬間，回想起來，一切都美好得不可思議，並祝祖兒在未來的日子依然笑得爛漫可愛。