車婉婉自稱新人學拍劇

　　(星島日報報道)車婉婉（婉婉） 在TVB劇集《我家無難事》與鮑起靜（鮑姐）、馬德鐘、楊明及胡㻗在劇中飾演一家人，雖然面對種種問題，但齊心協力都有辦法去解決，當中鬧出不少笑料。車婉婉坦言自己拍劇的閱歷好少，大多以客串形式演出，更謙稱當自己為新人，今次跟鮑姐、馬德鐘及楊明等合作要向他們多多學習。

　　劇中婉婉與鮑姐的一段母女情，兩人不時會鬧交，相當重火藥味。婉婉說：「我個角色專長係頂撞阿媽，我相信好多女仔都承認自己曾經同阿媽講過：『唔要、唔使呀！』這些鏡頭大家回想下，相信對阿媽都講過唔少呢啲衰嘢。我同鮑姐好多戲都鬧交，唔鍾意佢管我，所以會覺得我巴渣。」

　　婉婉十分欣賞鮑姐好有媽媽的氣場，監製王心慰初時找她傾已經好鍾意呢個故事，當時只係跟她說會跟鮑姐飾演一家人，婉婉已經好恨拍，但當時正發生疫情，於是就祈禱希望一定要拍得成。

　　戲中與兒子胡㻗關係疏離的車婉婉，坦言現今社會不少婦女要外出工作，於是將子女交由長輩照顧，難免婆孫關係比母子關係更為親密。

　　婉婉說：「我同胡㻗的關係就係媽媽鮑姐錫我，幫我照顧個仔，我自己咪尋找歡樂又識男仔，所以我會視個仔胡㻗好似朋友看待，但在兒子心目中有不平衡，呢個係好寫實的事。」婉婉在戲中飾演有個咁高大兒子的母親，不過她笑言不介意，更認為最緊要角色有得發揮，雖則現實中，兒子Justus Quinlan（BBQ）只有4歲大。

　　而今次婉婉在劇中佔不少戲份，不時外景接廠景拍攝，就連休息時間也不夠，難免跟寶貝仔BBQ減少親子時間，不過她笑言唔理得太多。她說：「兒子BBQ都有搵我，因為平時我同佢睡覺，但有好多日發現我唔響房度，跟住佢就瞓響我張牀個位，當我返屋企沖涼見到佢同老公一齊睡，佢又會問我：『媽媽昨晚去咗邊？』我話要返工，佢又問點解要返工？不過依家佢開始明白了。」對於戲中跟兒子關係疏離，談到可會擔心BBQ日漸長大後跟她關係不及以前？婉婉笑說：「我又無擔心，成日覺得盡力而為啦！好多事無得想太多，作為父母去栽培小朋友盡力而為，點樣最好無盡頭！我覺得小朋友好似一朵小花，投入幾多心機就會響度，就算大個仔了，心裏面都會有媽媽。」