孫慧雪嫌老公收藏品阻地方 被彈唔識嘢

當你返到屋企，客廳突然多咗一嚿巨型黑色「怪獸」，第一個反應都係會問：「乜料呀？」孫慧雪日前就遇到呢個情景，喺社交網上載老公嘅最新收藏品，佔據客廳好多位置，連埋成幅牆咁大嘅紙盒同發泡膠，梳化都遮晒，認真頭痕！

雪雪留言話：「當你返到屋企，見到舊嘢牙咗你屋企半個廳？你嘅反應會係⋯⋯⋯」雪雪即刻質問老公：「乜料？」而佢老公就答：「好型喎！」雪雪無言。不過，長期佔據客廳都唔係辦法，所以雪雪就逼老公將件黑色收藏品pack番入箱然後搬去迷你倉，雪雪仲爆老公嘅收藏品已經逼爆咗3個迷你倉，多到可以開展覽，老公話全部都好保值，但自己就完全唔識欣賞喎。

其實呢件黑色收藏品大有來頭，係紐約殿堂級塗鴉大師 FUTURA與香港公司 AllRightsReserved 合作嘅限量版模型「FL-006」，今年5月開售全球限量350個，定價為$15300港元，屬於男士嘅全新玩偶;網上炒價現已達2萬3千元，短短3個幾月已升值近50%，雪雪老公果然有眼光，連金曲歌王林俊杰（JJ）都有一件透明版。