獨家丨孔德賢願拍BL戲可瘋狂肉搏　「巨鵰」小鮮肉獲封基界男神

出身自J2節目《#後生仔傾吓偈》的24歲小鮮肉孔德賢（Danny），早前在《明星運動會》疑不慎露「巨鵰」而掀起熱話。節目中掃走6金2銅的他，因為酷似羅子溢（即羅仲謙），加上不時於社交網晒爆肌照，IG吸引好多男粉絲，更頻頻被男網民留言調戲！獲封「新一代基界男神」的他直言，有興趣參演近年大熱的BL（Boy's Love）劇，講到明冇底線與對手肉搏！撰文：黎寶倫　攝影：張詠森

入秋後最適合行山，「山系男孩」孔德賢率先帶《頭條日報》讀者入鹽田梓，穿過紅樹林沼澤、玉帶橋再登上雙子亭，飽覽360度小島風光！見沿途佈滿藝術品，Danny認為很適合一家大細來郊遊，平時自己則喜歡即興約兄弟行山，「香港女仔好少行山，有啲係去打卡，玉帶橋就啱秋冬天嚟拍拖，因為小橋旁邊有海風吹，談心一流。（擇偶要Sporty？）都係講Feel，我鍾意善解人意、成熟啲嘅女仔，咁先體諒我做嘢陪唔到佢。」

捨丁子朗要Ali
中學時期，身為田徑好手的他曾5奪年度最佳運動員，加上考試全班頭3名，自然是校內風頭躉，但Danny自言唔多女仔追，「到而家都冇女仔Approach我。（有男仔追？）有男仔撩我傾偈囉。（男性緣好？）一半半，我都冇乜所謂，識個朋友啫。」對深受男士歡迎，他笑言能包攬男女Fans好幸福，問有否興趣演BL劇？Danny說：「絕對可以！我鍾意做挑戰性角色，同埋呢個係幾有趣嘅Topic，都想演好佢令香港觀眾知道LGBT好緊要。（想同邊個拍？）丁子朗，因為大家差不多年紀，佢好Charm、笑容好Sweet。（介意演親密戲？）為拍戲我可以冇底線。」不過當與女神李佳芯（Ali）二選一，Danny秒速拋棄丁子朗，仲狂讚Ali又Pure又有氣質。

恨演戲做打仔
《#後生仔傾吓偈》本月底結束，率先由綜藝節目主持轉型拍劇的Danny，除熱播中的《把關者們》，亦有份演出《青春不要臉》和《星空下的仁醫》等，「拍劇同綜藝我都鍾意，兩樣嘢完全唔同，做綜藝節目要Keep住全日講嘢、好Hyper，其實好攰，反而拍戲唔需要同人交代太多自己嘢，只要投入做好角色，係畀我休息嘅地方。」喜歡不斷學習求進步的他，又盼繼續於戲劇方面發展，最恨演《飛虎》此類英勇角色，「想拍打鬥、飛嚟飛去、撞車飛車戲，細個都學過泰拳一段時間，我都打得㗎，哈哈！」