Dear Jane紅館個唱Howie險中「頭獎」：差啲就未開始已經結束

Dear Jane昨晚在紅館舉行一連五場《Dear Jane Pendulum Tour 2021》演唱會，他們首次以4面台的在紅館演出慶祝入行15周年，主音Tim(黃天翱)的老婆楊洛婷一如過往，在台下高舉「老公」粉絲牌，還有好友曹敏莉陪伴，圈中好友還有鄭融、湯駿業、曾若華、陳煒及男友等到場支持。Tim指在場觀眾的反應令他感到震撼：「確定喺紅館開show，只係個零兩個月時間，大家都知道呢兩年少咗好多演唱會，出嚟見到大家，真係有啲嚇親，多謝大家買飛嚟睇。」

談到創作歌曲的歷程，Howie 稱，見到主音Tim與太太那麼恩愛，有幾首歌也因此被啟發創作出來，黎俊華（Ｎice）笑指，失戀歌不包括在內，Howie即說：「失戀歌我哋三個人分，失戀、分手是我同Nice，求婚唔成功留畀Jackal(伍漢邦)。」Howie再爆一曲《草戒指》原先是寫給Tim作求婚之用，不過這首歌還未創作完，對方已成功抱得美人歸，所以今晚決定將歌給Jackal徵婚。

4位成員於個人表演環節大唱別人的歌，4人跑勻4角交換唱歌、彈結他及鼓位置演出，期間有兩名男粉絲突然跨欄衝上其中一角位的舞台，其中一人拿着手機搭着Tim的背部想影合照，隨即被工作人員驅趕返回欄杆內，搞到正在彈結他的Tim顯得一臉驚愕。

之後Tim演繹兒歌界神曲《Let It Go》並公開地冧爆愛女Tanya說：「唱畀我一生人最愛嘅女人，我會錫佢！」Dear Jane於頭場邀得AGA 擔任演出嘉賓，一起合唱一曲《MAD》，之後Dear Jane離台換衫，AGA表示：「呢次做嘉賓有啲特別嘅感覺，亦係我第一次踩4面台，啱啱喺後台已經好興奮，上嚟見到大家感覺好夢幻，感受到四面台嘅歡呼聲真係好正！」

Dear Jane唱畢《未開始已經結束》，一個大型六角吊台在舞台頂徐徐降下，Howie差點險中「頭獎」，幸好Tim用手推開Howie而避過，Howie 幽默地說：「真係差啲就未開始已經結束。」在Encore環節前，螢幕播出Dear Jane十年前首個售票演唱會片段，Howie憶述當年場地可容納6百人，開售一星期後同事通知他們只售出7張門票，他們便盡力求朋友拉多些朋友來，但最終只能售出270張飛，還要出動30名同事幫手撐場，當時場地也要斬開一半，努力4年後於九展開3千人騷，再於兩年前登上紅館開騷，Jackal感觸地說：「而家五場紅館都畀你哋買爆晒，係你哋帶我哋上呢個台，其實最珍貴係，我們做完咁多首歌，就係有你哋嘅支持，希望你哋唔好再走散，唔好離棄我哋，今晚、聽晚睇完之後，一路帶多啲朋友入嚟Dear Jane Family，我們就係一家人！」