獨家丨大廚保哥帶埋家人做善事中秋前夕攜自家月餅送暖

2021-09-21 00:49

TVB《煮戰》今周去到由最高分數的兩個大廚互鬥，星級廚師黃亞保(保哥)及張錦祥（Ricky）從旁打氣，節目更有刺激性。最近保哥忙到冇停手，除錄影節目外，中秋前夕開通宵製作蛋黃陳皮豆沙月餅，還抽空帶埋老婆及四子女去慈善機構探訪派月餅送暖，好有愛！保哥堅持身教，幫到人係一種福氣。採訪：方騫平

首年推出月餅的保哥今年中秋前夕，帶同自家製月餅及湯包，分別探訪護老院、露宿者、劏房戶、單親家庭等，大廚駕到相當哄動，受歡迎程度不遜於當紅藝人，唔少「老友記」叫保哥加油，連復康人士透過電視節目見到保哥嘅作品，都讚保哥廚藝了得！

學埋西廚增值
保哥自覺不是大明星，但想不到都被認識，「憑自己少少力量可以幫到人，好開心亦好滿足。」著重仔女品行多於成績的他堅持帶埋四位子女同行，亦認為教育小朋友係終身責任：「要培養孩子善心，多做義工，令佢哋體會到幸福唔係必然，而且施比受更有福，日後成為負責任的大人。」越南華人保哥7歲隨家人偷渡來港生活，會考只得一分，不過獨愛下廚，中學時期主動要求加入家政班，是班中唯一男學員：「最近我學埋西廚，都有去中學做講座，跟同學仔分享人生勵志故事，希望能感染到身邊人。」