杜德偉父子檔公開合唱 4歲半AJ歌聲清脆表現淡定

杜德偉與囝囝AJ於「救狗行動音樂嘉華」父子檔合唱《What a wonderful world》，年僅4歲半的AJ，以清脆歌聲搏得全場掌聲，遺傳了爹哋的唱歌天份。Alex笑說：「搵囝囝一齊演出，可以拉勻返個年齡界線，潮流興青春偶像，所以我介紹AJ呢位新力軍畀大家認識。」

對於兒子演出獲大家讚賞，Alex開心的說：「佢幾個月前開始練，有一日我太太播歌氹佢瞓覺，播咗我和daddy（AJ爺爺）當年合唱過的一首英文歌《What a wonderful world》後好鍾意，然後AJ就話要學，當時都未話有今次演出，但係佢真係好用心去學唱呢隻歌，精神可嘉！」Alex亦讚囝囝表現，指AJ平時台下比較怕羞，沒想到上台後又好淡定。