獨家丨ZW製作西人三部曲恥笑「偽人」 寫歌串爆歌手唔識扮有料

四人樂隊Zolarwind2.0(ZW)製作「西人三部曲」系列，近日推出第一步曲《馬騮戲》就唱爆啲偽君子，歌詞內容相當搞笑抵死，嗒落必定會心微笑！成員藝深大膽爆出樂壇荒謬現象：「有啲歌手唔識做監製、編曲就用嚟掛帥，甚至唔識打鼓喺紅館打鼓！不過，林家謙係例外一個。」採訪：方騫平 攝影：葉君海

Zolarwind2.0成員藝深、阿冠、Tommy、波子解構「西人三部曲」系列，藝深說：「我哋會探討身邊人與事及社會話題，《馬騮戲》歌詞內容係鼓手波子喺工作上受欺凌嘅真人真事，其實身邊有好多人好假，做埋啲馬騮戲片面嘢，冇料扮有料，所以寫嚟笑吓、發洩吓！」

提醒自己唔好做小人
波子大笑說：「我嘅經歷係俾阿冠恰，所以隻歌係阿冠寫緊自己！因為阿冠唔鍾意寫啲大路嘢，呢首歌好有批判性，睇唔過眼要出聲，仲用咗廣東話嚟寫詞，想表達得更加貼切。我諗小人好似便利店咁總有一個喺左近，一部曲係唔夠，最終做咗『西人三部曲』。」Tommy說：「都好嘅，盡量警剔自己唔好做小人角色，咪做啲乞人憎嘅嘢！」阿冠卻回話：「我諗每個人都會有乞人憎嘅嘢，睇吓有冇表達出嚟啫。我覺得唱歌鬧人唔難，在乎背後有冇意義。」藝深坦言喺呢行「見識」好多：「有啲歌星唔識做製作，但擺個名做唱片監製，講到天花龍鳳連行內人都笑！社會上有太多虛偽嘅人！」Tommy說：「其實除咗音樂圈，喺職場上都有好多擦鞋仔。」