獨家丨Lokman AK笑指衰貪靚姜濤叉電後已冇大礙

2021-09-15 21:00

姜濤昨日出席活動時，一度因胃痛突然暈倒，今日MIRROR隊長Lokman及副隊長Anson Kong（AK）為合唱新歌《虎道門》接受《頭條日報》專訪時透露，姜濤休息過後身體已冇大礙，Lokman又笑指姜濤衰貪靚而出事，他們又為事件引發種種是非解畫。撰文：杜杜攝影：葉君海形象 :PIPA Creative 髮型：Man Chan @Chic Privat i Salon 化妝：Giann Cheung @AnnieG. Chan Makeup Centre 服裝：Harvey Nichols, Giuseppe Zanotti 場地：Jas Party

Lokman話姜濤休息一晚身體已叉足電，又笑指對方衰貪靚出事，「佢之前拍攝太攰啫！又拍到凌晨，又第二日咁早，貪靚又着長褸焗得滯，冇辧法上得台真係要靚仔啲，着件褸睇落係幾有型，太單薄真係差少少。」AK表示姜濤已向隊友報平安，「佢喺Group度有同我哋報平安，OK冇事，休息後好咗好多，多謝大家關心。」

姜濤經常掛在口邊話減肥唔食嘢，今次會否因捱餓出事，AK就認為唔關事，「大家都知道唔可以好似第一次演唱會咁唔食嘢，所以大家都係keep住食嘢同keep住去做運動，不過阿姜係呢排套戲日夜顛倒，令佢個胃適應唔到，佢又好睇重好緊張，可能壓力令到佢個胃痛，呢幾日佢個胃都唔舒服。」

同「歌神」冇得比

對於有fans怪責花姐將工作排得太密，令姜濤出現過勞情況，AK和Lokman就覺得不應怪責公司，更指花姐及工作人員比他們更攰。Lokman說：「花姐仲攰呀！（AK：花姐真係仲攰，我哋瞓幾多，花姐一定少過我哋。）我哋一個都攰，佢仲要照顧咁多個仔，你諗吓再乘番咁多倍。」AK再補充：「理解大家對我哋嘅關心同埋呵護，但係我哋絕對明白，食得鹹魚抵得渴，我哋自己揀嘅，呢個唔關公司事，噚日睇到呢啲comment都有啲唔開心，忽然成件事怪責咗落公司度，希望大家釐清番件事。」

講到有指日前「歌神」張學友相隔20年擔任港姐決賽表演嘉賓，有人拿阿Jer和姜濤作比較，指阿Jer才是「新歌神」，而姜濤人氣亦勁過對方，更引發網民罵戰，懷疑姜濤因此事情緒受影響而出事，Lokman和AK就澄清應該無關，亦認為姜濤絕對不能跟「歌神」比較，更希望外界用互相欣賞角度更好。AK說：「唔好睇阿姜咁重，邊有得同『歌神』比呀！哈哈！學友前輩真係好大嘅前輩，我哋個個都好鍾意佢，佢係一個學習對象，好明白呢段時間大家好容易將我哋同人哋比較，喺我哋眼中我哋一定係be humble，我哋仲有好多嘢需要學習。（Lokman：同埋換角度唔好比較，試吓欣賞。）」