點呀丨為宣傳廣東新歌 傅穎邊唱邊自拍自己喊

自ViuTV劇《男排女將》後，鄧麗欣（Stephy）曝光率好高，早排力圖打排球活動，更帶挈前Cookies隊友楊愛瑾（Miki）上電視仲可以講幾句添。Stephy陳年宿敵傅穎（Theresa）舊年因為疫情返咗香港，當時佢仲話會將工作重心搬返嚟，唔見Theresa有咩演藝工作，不過有社交平台就唔怕冇機會曝光啦。

36歲嘅傅穎啱啱推出《寫給無情人的情書》的粵語版《根本故事都跟我無關》，睇歌名都知係啲失戀慘歌，一向鍾意拍片放上網嘅Theresa就玩一個小測試，試乜嘢?就係「一首一唱就想哭的歌」，然後佢就唱咗《根本故事都跟我無關》，重點係佢拎住播住歌嘅手機自拍，邊唱邊開始眼紅紅，最後眼有淚光地完結。為怕Fans擔心佢，佢喺hashtag講明，#不要留言安慰我 #我真的沒有不開心😆，搞咁多嘢都係想宣傳新歌，但呢個唱住自己歌然後喊嘅舉動，真係唔係人人做到，同埋做得出。