李司棋做送餐專員遇重口味女僕 張文傑祖祖派心心勁攞膽

梁祖堯日前在IG貼上與李司棋的一張合照，當時留言說：「這個前輩，我俾200分（10分滿分），我愛司棋姐！我愛司棋姐！我愛司棋姐！#好快有得睇」事隔數天，謎底終於揭盅，原來祖祖與司棋姐為外賣送餐平台拍廣告，同場還有張文傑（German）和張天賦（MC），原來司棋姐這位前輩級的演員相當玩得，玩起來一點都不輸蝕給後生仔！

今次司棋姐變身做「送餐專員」與飾演保安的梁祖堯過招，表情多多兼不時擺出kawaii的pose，同時間，祖祖與German先後以拳手及女僕造型接外賣，其中German的女僕造型最為「重口味」，低胸短裙的制服下，露出粗獷的雙臂與紋身，與祖祖大派心心，最後司棋姐與小鮮肉張天賦過招，MC即場唱了一句《反對無效》的歌詞，司棋姐竟然接著一起唱《反對無效》的其中一句，果然夠晒貼地！

首次穿上女僕裝的German，他笑言：「唔知點解一穿上已好自然投入咗角色，化妝師幫我喺臉上畫一個心型，我覺得自己靚咗、可愛咗，講嘢都溫柔啲，我覺得我可以挑戰拍攝電影《翠絲2.0》。」不過今次並不是他首次穿上女裝：「十幾年前因工作關係，我經常著女裝，因為以前又高又瘦，我呢種身型幕後做女演員替身係最適合不過，以前做女演員替身已經好多人讚我靚女架喇！」今次與祖堯合作當然勁興奮：「係超級過癮，我哋兩個拍攝期間，不停撞到好多橋出嚟玩，大家都笑到停唔到，好期待下一次同祖堯再jam下。」German亦大讚司棋姐：「司棋姐係一位好有愛嘅前輩，佢不停讚我好靚仔，又讚我好靚女。但當見到我有紋身既時候，母愛突然湧現，嚴肅地問我咩黎？唔痛架咩？做咩紋身呀？我唯有尷尬咁話：『因為靚。』」