離婚加零收入曾想過自殺 魏駿傑揭與滕麗名分手真相

魏駿傑入行30年，日前接受港台主持車淑敏訪問，提及人生低潮、婚姻與昔日與滕麗名的一段情。他透露去年與細廿年的張利華離婚，加上疫情已有1年半零收入，雙重打擊下有輕生念頭。「我要去睇心理醫生，我有諗過自殺，覺得好慘，係個女救番我，當時我諗起佢唔可以冇咗我，將隻腳踏返落嚟。」他自言在女兒面對每日都好開心，好擔心被女兒知道，影響她的一生。

魏駿傑自覺是110分好爸爸，但做老公只有30分。雖然每年情人節都會為前妻炮製心形牛扒和送花，但似乎仍未足夠，「我哋都開心過，離婚係因為人會變，我變得太離譜，淨係掛住湊女而忽略咗佢？就當係啦！大家好落台。」他曾亦有意再找另一半，想過公開招女伴，但遭女兒反對：「唔得㗎！你淨係可以愛我一個。」最近他接獲不少北上的工作邀請，但因為不捨在港讀書的女兒，認真父女情深。

其實魏駿傑也算是長情的男人，婚前與滕麗名拍拖9年，至2008年分手。當年二人在《陀槍師姐》系列中分別飾演陳三元和程峰，魏駿傑表示分不清戲裏戲外，「人哋會以為係藉口，我當然係真心愛佢，否則唔會（拍拖）8、9年，大家好期待我哋結成一對，但我成日都想做普通人，點解要做金童玉女？！」他透露當年離港北上發展，有30%是為了滕麗名，因為自己逃避，覺得對方愈來愈紅，自己配不起；現在滕麗名成為朱太，知道她過得幸福開心，他也開心。

而早前魏駿傑出售西貢2千呎獨立屋，他透露現時租住較小單位與女兒居住，感覺更親近，並相信希望在明天：「一切都會有好轉，去年我嘅運氣咁差都過到，所有香港人都可以過到，唔好放棄，未來只會愈嚟愈好！」

24小時求助熱線︰
生命熱線︰23820000
明愛向晴熱線：18288
東華三院芷若園熱線︰18281
社會福利署熱線︰23432255
利民會《即時通》：35122626
撒瑪利亞會熱線(多種語言)︰28960000
香港撒瑪利亞防止自殺會熱線︰23892222
賽馬會青少年情緒健康網上支援平台「Open?」：www.openup.hk
醫院管理局精神健康專線(24小時精神健康熱線諮詢服務)：24667350