對煮兒童餐好有心得　張震嶽整玉子燒囝囝食晒

張震嶽同老婆小涵於18年結婚，同年9月做老竇，囝囝「小谷沐」月尾就3歲嘞，以前唔多講私人嘢嘅阿嶽因為有囝囝好快樂，而家好願意開心分享湊仔樂事，仲講到明恨生女，不過再係仔都無所謂。

阿嶽好照顧囝囝嘅食同玩，成日孭住BB「小谷沐」去遊山玩水，到囝囝大個啲，又教佢玩滑板車，仲讚囝囝學嘢好快上手。講到最開心就係每次整嘢畀囝囝食都會食晒，有人捧場阿嶽都煮得好開心，噚日佢就整咗個餐包夾蛋畀囝囝做午餐，「媽媽牌餐包+爸爸牌玉子燒+楓糖=簡單又好吃，小朋友最愛💗」，睇賣相的確好吸引喎。