紅館騷尾場兩度Encore 方皓玟唔畀老公知同猛男共舞

一連四場的方皓玟紅館演唱會昨晚尾場，朱薰、Tyson Yoshi和女友Christy、張蔓姿、釗峰、李靖筠、王嘉儀、黃耀明等人都有捧場。尾場繼續由RubberBand、林家謙和章尾而擔任嘉賓，RubberBand的阿偉表示：「最後一晚，好唔捨得台上有型嘅方皓玟，因為之後會見返平時戇居居、講嘢慢5秒嘅佢。」阿偉又代大家多謝方皓玟，因為她一直堅持為這個城市做音樂，帶給很多人力量，「即使日子好困難，都用心做一個好好睇嘅演唱會。」方皓玟繼第三場罕有Encore後，昨晚更兩度Encore，又獻唱《Life Is So Beautiful》畫上完美句號。

方皓玟完場後接受訪問，她指因為現場氣氛很好，故決定加碼Encore。她坦言：「有諗過開多幾場，不過一步步嚟啦！第一次喺紅館開騷，希望帶最好嘅演出畀觀眾，而且大家期待咗一年幾，終於順利舉行好感動。」講到造型性感，方皓玟表示：「啲造型好靚又好有型，期望一切以藝術行先，亦都想同全個團隊再次合作。」

被問到會否開演唱會Part 2？方皓玟說：「今次個Rundown好值得睇，所以無論係全新或Part 2都想開。」今次開騷有不少半裸猛男Dancers，她笑言不敢再找更多大隻仔伴舞：「（人數）已經有一打喇！個個都好努力修身，有好多肌肉好有型。（老公會唔會呷醋？）佢喺日本有嘢做，嚟唔到好可惜，不過我冇同佢講個騷有猛男，又冇講有網上版，佢都唔會自己搵嚟睇，哈哈！不過就算睇到都OK，佢好Open Mind。」