【獨家】羨慕阿儀爆紅出攬枕有戲拍 張可盈憑34D做亞視二姐
2021-08-29 22:41 
2019年亞姐《最完美體態小姐》得主張可盈(Natalie)以隊長身份，帶領今年候選亞姐接受挑戰。講到新一屆亞姐(香港區)將於9月25日誕生，就連面試時已被Foul嘅薛影儀（阿儀）都被追捧，張可盈強調呢兩年經已裝備好自己，唔怕冇碇企，不過，都好羨慕阿儀咁快就爆紅，仲做埋「亞視一姐」。採訪：方騫平 攝影：葉君海
張可盈擁有34D激爆身材，只可惜豐滿身材幫唔到佢帶來名和利！張可盈回憶參選時好有自信心：「當時恃住自己身高1米75高人一等，身材平均，而且識唱歌、跳拉丁舞、同埋彈琴都有啲才華，仲有浸大學歷，點知都係得個《最完美體態》獎，可以畀到我入行機會咁囉。其實任何演出機會都想試吓，亦唔介意着泳裝演出，有機會做到晶女郎都唔錯嘅，但平時唔會刻意着得性感去賣弄身材。」
欣賞阿儀夠真
Natalie又羨慕阿儀咁紅：「市面出咗佢嘅雙面攬枕，佢仲有廣告同有戲拍，真係好犀利呀！我唔會同佢爭，反而要向佢學習，因為啲網民鍾意阿儀個人夠真同埋夠自信，呢啲我未必做得到，不過阿儀的確好可愛，有次佢喺公司見到我會好奇追問『你坐乜返工？』『有冇聽我唱歌？』『有冇睇我報道？』其實我都支持佢㗎！見佢出嚟一星期就做到『亞視一姐』，哈！我唯有做『二姐』啦！我好失敗呢！」
關鍵字
最新回應