【頭條戲場】《危樓深淵》 爆笑自救逃生指南

由車勝元及李光洙等主演的《危樓深淵》成為韓國年度開畫票房NO.1，電影Sell災難喜劇，究竟面對災難可以點樣笑得出呢?抱住成頭「黑人問號」入場，散場後好有感覺，災難喜劇果然又災又喜，好笑程度係哈足全程，笑位完全估唔到，減壓一流，金志勳導演好嘢。(9月2日上映)

撰文:廖思慧

金志勳導演拍完大型災難鉅作《火海108》之後想拍一套更人性化的電影，然後有一日睇到一則關於海外的天坑新聞片段時非常好奇，「如果喺韓國出現咁大嘅天坑會點呢？如果我跌咗入去又會點呢？如果我啲家人跌咗入去又點呢？」然後導演就開始構建角色同佢哋嘅故事，「我冇專注災難本身，只想展示人類應該點樣面對災難。」

屋企要有求生包
為咗搬到首爾方便返工，東元（金成昀飾）辛苦11年終於成功上車買樓，搬新居無耐已覺唔對路，自私同事金代理（李光洙飾）發起舉行入伙Party，飲飽食醉嘅兩人連同一眾鄰居，包括同東元早有牙齒印的萬壽（車勝元飾）一齊直墮地下500米的深坑。500米又幾深?嗱，香港最高嘅ICC都只係484米咋。被困時可以去廚房摷食物同水，求生物品都唔太難搵，但撞正暴雨，拯救隊又因為天坑隨時再下陷而未能派員拯救，用航拍機拍攝求生者又因太深收唔到訊號而「墮機」，時間一分一秒咁過，以為死路一條?唔好睇小人類嘅求生意志，避唔到一齊撐落去。

咪以為只有李光洙引你笑，車勝元原來更癲，全片笑位計算得啱啱好，導演功力好強，散場時一身鬆晒。