Juicy叮｜同居兩個月男友「原形畢露」唔做家務 女網友求救惹議

正所謂「相見好同住難」，有女網民近日於討論區發文，主題為「同居好攰，因為另一伴太懶」，指她與男朋友同為打工仔，早兩個月開始同居，基本上男朋友負責交租，支付水電費，另外再給她5,000元作生活雜費及買餸錢，而她則負責買餸、煮飯、洗碗、拖地、洗衫晾衫。

女網友指，他們居住的單位屬開放式，僅二百多呎，所以每天拖地非常容易，她亦不介意做。當初男朋友應承她會幫助執屋晾衫，惟同居僅兩個月便「原形畢露」，「佢每日放工等食，食完就坐或攤，有時食完飯又食生果，萬一佢食完攤咗上床，堆垃圾就只放咗喺枱，而垃圾桶啲垃圾又會放到聽日，洗好啲衫又唔會晾，因為佢已經瞓咗。」

女網友明白男朋友已負責家庭大部份開支，亦了解他工作辛苦，放工後非常疲累，但坦言自己亦很累，曾嘗試要求男友改變，甚至雙方因此發生爭執及冷戰，但問題一直未解決，「佢任我鬧唔嬲，但我日日為咗咁嘈自己心情都唔舒服，我有諗過就放喺度乜都唔做，就大家都唔好做……我真係好攰，繼續點樣行落去」，於是向各位網友求救。

多名網民都呼籲她「睇開啲」，指她的男朋友已支付5,000元家用，若她真的很累，可以將這筆款項拿來請鐘點或工人，「佢已經養起你大半，仲想點？世事無完美。」「一同生活就係咁。互相體諒。 唔好小事化大。」「始終兩個唔同嘅人生活一齊係需要磨合。」

不過，亦有人留言讃揚她，覺得她脾氣很好，容忍力一流，但坦言若男朋友一直沒有改進，奉勸她不如回家居住，「完咗約就分手啦。」「同居就係體驗共同生活習慣。今日如此，日後只會變本加厲，三思。」

來源：親子王國