【獨家】馬詩慧拍埋細女似姊妹　王麗嘉啜住肥仔水晒長腿

年過50的馬詩慧（Janet）已為三名子女之母，但仍保養得宜，個「殼」拍得住兩個90後囡囡。日前，她與二女王麗嘉（Irisa）以「母女潮Look」現身銅鑼灣買「肥仔水」，雖然頻頻攝取高熱量，但Irisa依然Fit到漏，當日仲着熱褲晒43吋長腿，索呀！採訪：梁志明

早前晚上7點半，馬詩慧與細女王麗嘉以一身Casual Look現身希慎廣場10樓的台式手搖飲料店，Irisa一邊排隊一邊拎住張「金鑽鳳梨綠」的宣傳單張研究，見她睇得好入神，睇嚟好感興趣喎！兩母女落完Order後，便雙雙企埋一邊吹住水等嘢飲，跟囡囡一樣穿上Oversize Tee襯熱褲、滑板鞋，心口再斜孭一個腰包的Janet潮味十足，遠睇跟26歲的Irisa儼如姊妹般，心境與外形都好Young！

食極唔肥
等了約10分鐘，兩杯飲品終於到手，最終Janet叫了杯水果茶，Irisa就揀了一杯卡路里較高的珍珠奶茶。雖然飲「肥仔水」，平日又鍾意食Pizza、薯條等肥膩嘢，但好在Irisa都勤力做運動，34D、24、35 Fit爆身形完全冇走樣，讓她可以盡情於IG分享水着、內衣等性感照。而當日為食Irisa一拎完杯嘢，即懶理疫情，一邊脫罩狂啜一邊穿插人群，並與媽咪繼續密密斟、搭扶手電梯走人。