專訪丨負評不會影響生活 七師傅：冇人識先唔會畀人討論

精通中西玄學的七仙羽師傅，雖然早已亮相各大電視台，想不到去年憑ViuTV節目《鬼同妳上位》中一句「師傅愛你」，揮低一眾性感後生女！之不過人紅是非多，七師傅不諱言冇人識才會不被討論，正如大家不會去討論豬肉佬，故不會被負評影響生活：「少許騎呢無傷大雅，目的只係想大家開心，正如我喺佛堂做法事嘅時候係師傅；做電視拍綜藝節目就係藝人，如果我喺綜藝節目中唸經先係騎呢！與其花時間睇負評累積負能量，大家不如睇我啲短片笑吓，仲有正能量呢！」

七師傅直言在節目中只是實話實說，不明白觀眾的笑點，但尊重想笑的自由，「原本係驚嚇節目，主持火火同保錡都驚到震，啲女仔仲驚到想退出，但經我表達之後變得好笑，喪禮都變婚禮，我有咩辦法呀？嗰陣睇到佢哋夜麻麻仲要露胸拍攝，又要畀鬼搞，好慘呀，我咪有感而發攬實湯沛宜安慰，邊喊邊話『師傅愛你』，諗唔到會變成咗招牌，拍乜嘢都要講呢句話，哈哈！」

自認花心的七師傅，無法在一眾小鮮肉中選出最愛，但看好姜濤不止是「亞洲第一」，大有機會衝出國際，「姜濤後生又靚仔，唱得跳得，如果我係姜濤，我許願一定不止亞洲第一，要做世界第一呀！之前同佢哋合作《考有Feel》，睇到佢哋嘻嘻哈哈，自己都好似好後生，連我男友最近都鍾意咗佢哋！」此外，她還讚保錡醒目但百厭，但很尊重自己，從來不敢撩她；193就靚仔、聰明又講義氣，曾幫她拿到很難入手的演唱會飛！