【獨家】又傳醜聞 無視被封「港版吳亦凡」　保錡開工黐仔唔黐女傾唔停

組合ERROR成員吳保錡憑人氣節目《ERROR自肥企画》翻身，極速洗脫偷食沙律（張沛樂）兼爆粗鬧網民的「負皮王」形象，早前更夥影帝古天樂拍廣告。未料，上周忽然被歌手韓子亮封為「港版吳亦凡」，指有人涉嫌迷姦及行為如「狗公」等，更要求對方公開道歉，否則「準備退出娛樂圈」！隨後，一名女Dancer亦於IG Story公開疑似保錡於19年「約炮」的對話，但保錡一於懶理，繼續於IG分享賣萌Selfie。日前晚上保錡於銅鑼灣開工，跟《造星 III》旨呈等男拍檔笑住傾，睇嚟心情毫無影響，唯獨與女拍檔就顯得避忌。採訪：梁志明

日前晚上近8點，《頭條日報》記者發現保錡與港版《大叔的愛》的「梓芊」徐㴓喬（Asha）、《造星》囝囝旨呈、Boris（黃浚銘），以及一班後生仔女到避風塘拍攝。等船期間，眾人聚集在附近的天橋休息，由於天氣炎熱，Asha等人均出動風扇仔散熱，穿長袖白Tee再笠短袖衫襯長褲的保錡，坐在梯級上不斷用紙巾印乾塊面。雖然又傳醜聞，但保錡心情OK，全程跟大家有講有笑，惟自知「桃花太旺」，怕再惹緋聞上身，所以刻意避開「女色」，跟女拍檔們企到離行離迾，只敢埋男仔堆吹水。

落力𠱁大家笑
休息一陣，大家又跟隨工作人員走到碼頭繼續拍攝，保錡睇嚟熱到頂唔順，邊拍邊拎住風扇仔狂吹，其間他亦好識搞氣氛，逗得一班拍檔頻頻哈哈大笑，而無論鏡頭前後，保錡都極少與女生們互動，相反旁邊的旨呈就與Asha講到郁晒手，夾在中間的保錡只顧傻笑向前望。之後，一行人再分成兩小隊登上艇仔，並駛到海中心錄影，見保錡在船上依舊笑得好燦爛，睇嚟早已萬箭穿心嘅佢完全無視被封「港版吳亦凡」及女Dancer公開「約炮」對話。