【古天后日誌】股市搵食艱難 但求不被割韭菜已飲得杯落

8月17日，天晴炎熱，稍後局部地區有驟雨。不得不向美股寫個服字，早段美股因為市場憂慮阿富汗局勢發展，尤其係美軍撤出阿富汗後，塔利班迅速掌權，令人懷疑其政治影響係咪會影響到全球市場。道指早段一度跌逾二百點，其後反覆回穩，最終道指倒升逾百點，再創收市新高，升110點；標指亦創收市新高，升11點；只有納指跌29點。 雖然地緣政治風險憂慮下，早段令美股走軟，但美企業績向好，支持美股做好，據FactSet數據顯示，截止上周五收盤，91%的標指成分股已經派O左第二季成績表，其中87%嘅企業每股收益高於預期，預計標指公司嘅整體盈利增長率將達到89.3%，係自2009年第四季度以嚟最快增幅。 雖然變種病毒正威脅全球，但無礙美國經濟復甦，有報道指若經濟持續復甦，聯儲局接近同意喺三個月後開始縮減買債，而並非個別官員主張明年中先開始結束買債。聯儲局官員意見並非完全一致，部份認為若經濟朝目標取得迅速進展，應該要提早加息；但另有部份官員認為對收水要保持耐性，需要見到更多強勁嘅就業數據，方能安心地話經濟已取得足夠進展，咁再容許當局開始縮減買債，收水唔可以太過急進。 經濟復甦同時，要面對另一難題係通脹升溫，睇返香港呢邊，8月政府推出消費券，藉此刺激消費，而各大商家保持「克制」已經兩年，捱到今時今日都唔簡單，借今次政府推消費券谷消費，不約而同加價幫補一下呆滯O左一段長時晅嘅生意額。事實上，早前內地水災，內地物資運輸亦受影響，天災亦影響糧食收成。另一方面，變種病毒全球肆虐，全球運輸亦因為防疫受阻，咁搞有乜辧法唔百物騰貴，樣樣加價。 除O左天災跟疫情問題，中美角力持續，雙方鬥爭沒完沒了，結果係全球被拖埋落水，世界景氣唔慌好得去邊，總之就係一個捱字。通脹升溫下，樣樣加價，無奈打工仔人工唔見有得加，以為可以喺股市搵食幫補一下，內地監管風暴下，股市操作愈見困難，中長線坐貨風險增加，短炒又唔多夠水位，值博率已愈來愈唔吸引。目前要喺股市求生，要盡量避開高估值嘅增長股，轉去搵估值偏低，以及息率較高嘅傳統股份，當中最標青係通脹受惠消費股，家陣都唔係望有幾多回報，但求持貨能避開監管風暴，唔想一覺瞓醒又因為官媒文章被割韭菜，咁已經算飲得杯落。 古天后 (徐狄怡，證監會持牌人)