【獨家】愛咗三十幾年仍似熱戀 黃智賢拖實老婆共享雪糕

53歲嘅黃智賢(Ben)最近忙拍邵氏新劇《廉政狙擊》，劇中跟羅霖再續《真情》緣份演夫妻。開拍前，黃智賢就爭取時間同畫家老婆Maggie行街食雪糕，仲一齊去超市買餸。黃智賢係出名嘅「愛妻號」，佢曾經分享維繫感情嘅秘訣，就係同步、同心，當日《頭條日報》記者就親眼見證到嘞。採訪:譚壹致

TVB有好多「愛妻號」，唔逐個講嘞，講漏就唔好啦，不過黃智賢係呢份稿嘅主角，唔怕講，一齊回吓帶先，提到夫妻相處之道，Ben坦言夫妻一定會鬧交，但會停一停，聆聽老婆嘅想法：「只要大家有咁嘅心去夾，就可以排除萬難。」佢又自爆不時送驚喜冧老婆：「佢好鍾意花，我會定期喺屋企換花，事前唔同佢講。我好在乎佢欣唔欣賞，就算係煮餐飯或插盆花，佢話鍾意我就好開心。二人世界就係我取悅你、你取悅我。」完全係夫妻相處之道教科書嘅內容。

溫馨家庭樂
好嘞講返份稿，當日下晝，黃氏夫婦現身又一城，兩人先去睇家品，乜都睇吓，明顯冇特定嘢想買，行咗個圈買咗少少嘢就轉去食雪糕，兩公婆分甘同味，你一啖我一啖，食食吓男方就戴返口罩畀老婆食晒佢。然後兩人去咗行超市買餸，揀菜都係黐住行，快買快畀錢就拖住手行去停車場攞車離開。