聲．夢飛行｜譚詠麟突襲後台派定心丸 胡鴻均撐場同門周柏豪JW

《聲夢傳奇》學員在昨（13日）晚舉行的第二場《聲．夢飛行First Live On Stage》，得到校長譚詠麟及星夢師兄胡鴻鈞（Hubert）到場觀看，二人更突襲後台為大家打氣。
校長即場傳授心得，並大派定心丸，「我對所有學員都絕對有信心，佢哋嘅抗壓能力好強，完全唔使擔心，最想留意吓之前教佢哋嘅嘢有冇真係運用到。」
Hubert昨晚才第一次正式同15位學員見面，「好戥佢哋高興，咁快已經有屬於自己嘅演唱會，大家要enjoy好好享受個舞台，係一個寶貴嘅經驗。除咗同15個學員打氣，當然都支持自己嘅同門柏豪同JW（王灝兒），希望大家都good show。」
昨晚第三位導師嘉賓周柏豪首次登場，同黃奕斌（Hugo）合唱了兩首歌《我的宣言》及《甘心替代你》，還重提大家初見面一個窩心的擁抱。柏豪說：「當時係第一次俾一個高大過自己嘅男仔擁抱，個感覺係幾warm嘅。Hugo係一個好簡單好純嘅男仔，佢表現唔好被淘汰嘅時候，居然係擔心連累我，好可愛。」
至於張頴康與老婆麥雅緻拍拖到場觀賞演唱會，除支持學員外，更加是來支持JW。