IG Follower升逾39萬 張家朗隔離做運動獲網民大讚腿好長

為香港在東奧奪金的香港花劍代表張家朗現正於深圳接受隔離，隔離生活唔易過，日前佢就同吳諾弘、大師兄張小倫及隊友崔浩然一齊開Live，最高峰有1.9萬人收睇，勁有號召力。

師兄弟在Live中互相爆料，大師兄張小倫率先爆張家朗暱稱叫「Jer Jer 」，大家問有咩特別意思，張家朗好似小朋友咁，即變高音答：「咩呀﹗因為我姓張之嘛，冇其他意思﹗」而直認單身的張家朗被隊友踢爆7大擇偶條件，直播約一個鐘，有爆料有笑料，娛樂性十足，被網民激讚精彩過明星開直播。

隔離最好就係做運動，IG Followers逾39萬的張家朗尋日就Po咗段運動片到IG，Caption係「Quarantine work out!」段快鏡運動片見到張家朗係咁跳，又用一個按摩滾筒去轆對腳同腳板，但好笑嘅係，段片除咗見佢做運動，仲見埋佢唞緊嘅時候，佢話「唔好問我點解放鬆仲長過work out!」Hashtag #因為我以為自己禁咗錄影嗰個掣 #點知冇，其實唔太明佢講乜，事旦啦，睇到張家朗就可以，學網民留言話齋「條腿好長」，冇錯，見對腳「發發吓」相當好睇。