【獨家】拉舊隊友郁禮賢加操跑街 林詠倫積極為E-kids合體備戰
2021-08-06 23:32This is a modal window.
E-kids的林詠倫(Alan)之前參加《全民造星III》後回春翻生，疫市下嘅收入都較以前激增3倍，密密有job接，今年仲有啲大project搞，唔排除疫情緩和後，最快年中後舉行音樂會，當然會益埋《造星》戰友及E-kids舊隊友。Alan日前拉埋E-kids成員Tim（郁禮賢）跑街，他要將積極態度，感染埋退下火線嘅Tim，好讓他為未來合體開show備戰。採訪：方騫平
雖然林詠倫喺《全民造星III》30強止步，但不論知名度、收入及形象都帶嚟正面成果，啟發他做人唔好太冇自信，喺唔損人利己情況下，勇於爭取係好事，他有感而發說：「E-kids一向好負面，以前啲人focus只係落喺Tommy（阮民安）度，冇人知我係邊個，成日混淆我同Tim，直至上年參賽後終於分得出，形象仲變得正面晒，真係好託賴。」
E-kids從來冇拆過夥
keep到團火嘅Alan繼續說：「𠵱家要把握黃金時機搏老命，追返過去流失嘅時間。」Alan堅持E-kids仲有生存價值，唔排除將來再合體。Tim附和說：「就算18年前啲人都狠批我哋做唔住啦！我哋咪又係咁樣做落去，就算𠵱家E-kids得返100個fans，我哋都會做。」Tim坦言E-kids三兄弟曾經歷過猜忌，甚至唔鍾意對方時候：「以前我冇咁大愛，但人大咗，會互相包容及支持，所以我見佢參賽壓力咁大，我好撐佢。𠵱家佢冇忘本，佢掂會益返啲兄弟，我哋做兄弟嘅點都唔會輸。我好愛佢，就算喺乜狀況下都愛埋Tommy仔，其實我哋三個從來冇拆過夥。」Alan贊同亦認為做兄弟要互相推動，亦要互相遷就，畢竟每人都會有長處及陋習。
最新回應