【獨家】簽唱片公司想開個唱圓夢鄭世豪諗定搵細龍太「再婚」

2021-08-06 21:59

2013年在《星夢傳奇》奪得亞軍的鄭世豪再次回復歌手身份，由去年加盟天盟娛樂推出《只准你話我是傻》、《當這個時候》及兩首翻唱歌，頭炮《只》歌係親自填詞送畀「細龍太」陳偉琪。可惜隨着陳偉琪離巢，近日劇情安排鄭世豪接受「離婚協議」，世豪笑說：「惟有喺我個唱中玩復合。」採訪：方騫平攝影：梁志明場地：THE STADIUM@觀塘

TVB處境劇《愛．回家之開心速遞》中，「細龍生」與「細龍太」係「最強CP」，不過卻因陳偉琪上月離巢被迫「離婚」收場，「細龍太」感性留言交待：「是我沒有福分，不值得你繼續堅持等下去。」鄭世豪對此同樣表示無奈：「喺角色層面上其實我係好愛『細龍太』，愛到要攀登大廈外牆引佢注意，所以要有好大理據先會接受到其他女仔。」

想同師弟展鵬合作
鄭世豪好希望今年內可以開到個唱：「由2016年自資出碟《仍堅持》，經已喺樂壇5年，累積咗一定嘅歌曲數量，我未開過個唱，最大心願開騷同Fans大聚會，到時會請埋『細龍太』同『Rebecca』（沈可欣）一齊唱吓快歌跳吓舞。」鄭世豪表示自己細細個已好鍾意唱歌，沖涼都會唱，好想可以唱到老。對於視帝陳展鵬做埋同門「師弟」，世豪唔怕多咗競爭：「唱片公司對我好好㗎！都係做好自己啦！我識咗展鵬好耐，大家有一齊去過登台，我反而想有合唱機會，最好搵埋佢做我個唱嘉賓，大家互相幫助。」