【獨家】吳卓羲甘心做貼身保鑣 劉心悠演Man爆女工好驚要爆粗

由吳卓羲（Ron）、劉心悠及廖啟智主演的電影《女人街，再見了》已是4年前的作品，Ron視心悠為女神，讚她靚之餘性格亦非常吸引，拍戲期間會不自覺望向她，搞到被導演投訴：「可唔可以望返鏡頭？」Ron見心悠腿部受傷更憐香惜玉，請纓做貼身保鑣，心悠坦言好感動。採訪：方騫平 攝影：梁志明 化妝：Marsha Ma（Ron）、Annie G Chou （心悠）髮型：Kenny Yeung（Ron）、Eric Chow@XENTER（心悠）服裝：Club Monaco HK 場地：The Wave

劉心悠與吳卓羲在電影中分別飾演搬運工人與蠱惑仔，開工第一日試第一個鏡頭，作為馬拉松好手嘅劉心悠因為未拉筋，被Ron拖住喺女人街喪跑時腿部受傷。眼見搞到女神受了傷，Ron極唔好意思，所以主動攤開雙手扮工作人員幫她護駕，擋開劇組以外嘅人埋女神身。他笑說：「啲人一定會埋怨我阻住晒好麻煩！」心悠對Ron咁貼心照顧大受感動，連忙解釋受傷唔關Ron事，只怪自己老貓燒鬚，準備功夫唔夠。而Ron因為合作將女神私有化，可以拖手兼𥄫實她，真係開心死！

導演拒絕紋身好失望
雖然負傷上陣，但演「港版羅拉」(搬運女工)對心悠來說唔算大挑戰，美中不足係準備時間有限操得唔夠大隻：「片中我要揸小型貨車同埋用唧車，言行舉止比較man，原先向導演提出加插食煙及紋身，點知導演話冇必要，我都有啲失望㗎！」心悠惟一唔想爆粗，明白自己講話唔夠地道，怕只會變成反效果，惹人發笑。