【Juicy叮】港媽攜3歲兒乘小巴拒付車資 司機提醒反被斥:少少錢咁緊張

2021-07-31 09:54
港媽攜3歲兒乘小巴拒付車資,反斥司機「幾蚊都咁計較」。資料圖片
港媽攜3歲兒乘小巴拒付車資,反斥司機「幾蚊都咁計較」。資料圖片

大部分專綫小巴路線收費不論大小均同價,有網民於社交網投稿指,近日遇到一名母親帶剛滿3歲的孩童坐小巴,卻沒有繳付其車費,引起司機及其他乘客圍攻,該名母親竟反斥司機,「少少錢咁緊張!」,事件更引起網民熱論。

該網民於Facebook專頁「生仔要考牌系列」投稿指,日前坐小巴時,小巴司機突然數次揚聲詢問,「係咪有人未畀錢?」,正當一眾乘客懷疑自己是否未付車錢時,司機再次揚聲指,「有位夠咗三歲嘅小朋友未畀錢呀!」,直指一位身穿校服,且佔著一個座位的小朋友。孩童的母親則表示,「啱啱夠三歲多幾日咋嘛!咁計較,少少錢咁緊張!」。司機則解釋因車資屬公司規定,非司機自己決定,惟該母親仍不滿,「幾蚊都咁計較!畀咪畀囉!」

車上有乘客目睹事件過程後,亦幫忙解釋「太太,夠三歲就要畀錢㗎喇,我小朋友都係咁,我諗你要習慣吓。」惟該孩童的母親不忿回應,「我而家咪畀咗囉,仲嘈乜嘢!你哋唔好咁執著啦!」,司機無奈表示,「你上咗車10分鐘都未畀啦」,乘客亦指,「太太,身教好重要,呢啲係規矩嚟,你咁樣會教壞小朋友」。

未料該母親竟反斥司機雙重標準,「而家我係咪未畀錢先?司機平時啲朋友都上車唔畀錢啦,雙重標準!」,再有乘客暗諷,「7000幾蚊一個月學費就肯畀,幾蚊車錢喺度嘈。做家長真係要考牌」。最後該母親疑因不忿寡不敵眾而中途下車。

樓主透露,該名孩童的母親上車地點屬貴價私樓地段,故估計其家境富裕,更指,「司機咁好禮貌,仲畀晒落台階,真係面係人哋俾,架係自己丟」。

帖文引起網民的熱論,網民紛紛斥該名母親行為自私無理,「做錯就要認,恐怕佢教出嚟個細路將來會同佢一樣,到時呢位家長自己受返晒」、「小朋友都幼稚園,仲要側側膊!滿三歲唔通人地會唔識睇?」、「坐左人哋個位就當然要畀錢啦,做咗人阿媽幾蚊都慳,仲惡人先告狀咁搞笑」。

資料來源:生仔要考牌系列

關鍵字

最新回應

關鍵字

相關新聞

熱門文章