【獨家】傳返內地拍真人騷　杜德偉珍惜時間湊仔食好

當日約下午4點，杜德偉與太太李曉冰（Ice）帶埋囝囝AJ，相約商台DJ雲妮及另一男友人，到又一城食Tea。Ice與雲妮邊食邊傾好投契，將頂杏色Cap帽反轉戴的Alex，就主力專心食麵和撳電話，間中先搭句嘴。未幾食飽的Ice忽然再Order嘢食，原來男友人湊埋AJ嚟會合爹哋媽咪，剛K2畢業的AJ好叻仔，唔使媽咪監督，都可以自己專心地拎住支叉捲意大利粉食，不過肥嘟嘟的他食到變污糟貓，勁得意，最終要媽咪幫手抹嘴仔。

杜氏夫婦好鍾意食Tea
食飽急去廁所，在旁跟男友人傾緊公事的Alex，立刻戴番口罩陪囝囝去wee-wee；放完水的AJ好輕鬆，大搖大擺揈住手仔、拖住爹哋行返餐廳，而Alex似乎都見怪不怪。最後逗留約一小時，一行5人終於埋單返屋企。而另一日下午3點半，杜氏夫婦再現身同一間餐廳，與一名女友人食Tea，其間3人交換手機睇相，暢談甚歡，傾足一個多小時才埋單走人；沿途行去洗手間時，兩個女人繼續雞啄唔斷，Alex就默默尾隨又搞吓頂Cap帽，去完廁所兩公婆便乘7人車離開。