三年抱三好生養 31歲陳嘉寶宣布陀第三胎：天父賜嘅禮物

現年31歲的陳嘉寶（Anjaylia/Anjay）今日在社交網宣布懷孕五個月，三年抱三，她留言表示一直覺得自己是遲婚、晚生育的人，沒想到22歲就遇到現在的老公黃頌祈（Epaphras），五年後結婚，至今已育有兩女，大女Hosanna只有兩歲半，而細女Eliana更只得十個月大，想不到現在正懷上第三胎。

不過，她未有透露BB性別，她說：「第三次的感覺熟識又有啲陌生，依然好驚喜，因為小朋友係一份天父賜嘅禮物，我同先生都有計劃嘅，只係冇諗過份禮物咁快又再嚟，好感恩。我同先生嘅屋企都係大家庭，知道小朋友可以一齊成長會好開心。」又說這次懷孕較之前累，幸得丈夫在身邊支持照顧，大讚Epaphras是個滿分的丈夫與爸爸，並謂很注重兩位家姐有爭寵的心理，會提醒自己不要偏心。

至於是否三個就夠了？她說：「三個小朋友家庭已經好大，要對佢哋公平，好好照料同教育佢哋，對我哋都要公平，我同先生都有自己嘅夢想同事業，要一路行落去，未必有心力再應付小生命，個肚點都要封住先嘞。」而老公Epaphras也在社交網分享舊照，感恩再做爸爸。


Anjay在2017年下嫁富二代、滑水教練Epaphras，男家幾代都在長洲長大，結婚當日長洲四處都掛滿巨型花牌祝賀，鄉親父老夾道歡迎；闊少Epaphras更豪擲五百萬出動遊艇、大紅花轎迎娶女神，非常巴閉！