【星島獨家】五大小生身價大披露 陳展鵬扭計加人工 遭TVB辣手嚴懲

2021-07-18 16:33
陳展鵬兩公婆夫妻檔出席活動,一齊搵外快。
陳展鵬兩公婆夫妻檔出席活動,一齊搵外快。

今年44歲的陳展鵬,歌手出身,相隔二十一年,今年2月經樂易玲穿針引線,簽約天盟娛樂成為一哥,歌、視兩邊發展,但將會在年底約滿TVB的他,在傾續約條件時,獅子開大口要求加人工,TVB拒絕就範。據知原本兩部新劇都安排陳展鵬做男一,但由於雙方傾續約有阻滯,所以TVB即時使出撒手鐧,視帝變陪襯,展鵬即刻知驚,唔再扭計加人工,乖乖續約!

  不過以TVB最賺錢和受客戶歡迎的多位小生來計,陳展鵬計埋接廣告代言,年薪約500萬元,而其他當紅小生如陳豪年收3000萬元、馬國明800萬元,相比之下他仍差一大截,所以他希望今次續約,可以搵得更多,可惜未能如願以償呢!

撰文∣娛樂組

  憑2016年《城寨英雄》拳佬一角奪得視帝的陳展鵬,結婚榮升爸爸後開始在熒幕減產,除了今年播出的《逆天奇案》,他對上一部劇集已經是2018年播出的古裝劇《天命》。但其實他沒停止過拍劇,幾套劇集包括《超能使者》、《黯夜守護者》和《唐人街》也正在排期播放。

重頭劇播出無期

  當中他寄望甚高的重頭劇《唐人街》,主題曲也是由他主唱,亦已完成錄音。陳展鵬一心打算繼16年《城寨英雄》奪獎後,再有機會憑這套劇獲提名,不過人算不如天算,去年九月《唐人街》宣傳片已播出,最後突然臨時抽起,原因是TVB乘勢安排人氣高企的王浩信《踩過界2》成為台慶劇,力谷王浩信蟬聯視帝寶座。令陳展鵬的重頭劇推出無期,人氣下沉。

樂易玲穿針引線圓夢

  出道時屬寶麗金歌手的展鵬,一直都有歌手夢,今年年頭,他終於等到機會,原來全靠樂易玲幫忙穿針引線,兩年前介紹展鵬給天盟老闆顏培意認識,最終他宣布加盟天盟娛樂,頭炮推出新歌《零歲》,實現21年後再推出唱片的心願。他現與海俊傑、天堂鳥及《造星》的Carmen和Odi同門,不過論資排輩,絕對係公司一哥!知情者透露:「原本樂小姐除咗介紹展鵬畀唱片公司老闆識之餘,都有介紹王浩信,不過唱片公司老闆講明一哥位只能夠二選一,而臨門一腳,王浩信被當時TVB一位高層阻止,目的係希望挽留王浩信呢隻『金蛋』,希望佢會同星夢簽約,點知王浩信最後兩邊公司都傾唔成,陳展鵬就如願在天盟坐正一哥位置!」

陳展鵬兩公婆夫妻檔出席活動,一齊搵外快。
陳展鵬兩公婆夫妻檔出席活動,一齊搵外快。
陳展鵬自從乖乖續約後,就連TVB舉行東奧的藝人運動會都積極參加,希望唔會被打入冷宮。
陳展鵬自從乖乖續約後,就連TVB舉行東奧的藝人運動會都積極參加,希望唔會被打入冷宮。

年尾滿約 獅子大開口

  2018年陳展鵬推出《天命》後宣布減產,他曾經表示因為要在家照顧患病母親,加上同年陳展鵬與港姐單文柔結婚,又誕下女兒小豬比,做新手爸爸上手後,展鵬也開始恢復拍劇工作,不停劇接劇。不過今年年尾滿約在即,正當TVB找他傾談續約事宜,展鵬就提出加人工條件,令續約過程有阻滯。有知情人士爆料:「其實展鵬首選一定會續約,不過佢就趁呢個機會耍吓大牌,博一鋪為自己爭取,一嚟就向高層提出要求加人工,每一集劇要同黎耀祥一樣身價,佢話自己依家有頭家,嚟緊仲想追多一個小朋友開支好大,加上佢要照顧患病媽咪,又要幫屋企人交租,所以扭計之下,遲遲都唔肯落筆續約!」

TVB出招反擊

  TVB原本很有誠意和今年年尾滿約的陳展鵬傾續約,但遇到展鵬提出獅子開大口的加人工條件,當然唔肯就範!加上疫情影響,展鵬又唔多商演收入,計落條數,當然唔會考慮大幅加人工!最終TVB使出撒手鐧,將原本由他擔正的劇集抽起,其中正在拍攝的新劇《隱形戰隊》由陳展鵬主演,現在卻改由馬國明做男一,展鵬只會擔任特別演出,令一套《童時愛上你》亦改由張振朗拍住高海寧主演,削減展鵬戲分。另外邵氏劇集《廉政追擊》更只安排他客串。知情者透露:「TVB一直覺得展鵬成日揀劇拍,又揀job接,而且佢比起其他人商演少,依家又返唔到內地揾銀,人工高又返唔到數梗係唔會加人工。相比起王浩信、馬國明嗰啲聽教聽話,又冇要求加人工,所以就決定畀啲顏色佢睇,叫佢唔續約都要盡快清返晒所有簽落嘅騷!」

轉軚主動要續約

  陳展鵬最初玩大牌,堅持加人工才肯續約,但眼見TVB開始玩強硬兼唔就範,展鵬終於知驚,態度180度轉變,最近更主動約見珍姐傾續約,更乖乖妥協不用加人工也肯續約,承諾唔會揀job接完全配合。講得出做得到,最近TVB舉辦的《明星運動會》,前香港乒乓球隊成員陳展鵬俾足面上場出賽,早前又和老婆單文柔夫妻檔出席活動,除咗拍劇收入,為了更博命搵錢,展鵬出口術表示疫情過後唔抗拒囡囡出鏡,全家齊搵銀!

有意追多個

  即將要連續開拍三套劇集,身為人父的陳展鵬在疫情期間好好建立的父女情又要被破壞,展鵬曾表示每次開工,他和女兒「小豬比」的感情就會有變,不過他和太太曾直言想繼續追多個,希望女兒將來有個伴。知情人士透露 :「展鵬同老婆一直都好想追多個,依家都係順其自然努力中,雖然佢哋而家仲未買樓,只係租屋住緊,生活開支都好大,但佢哋都覺得如果要追多個就趁呢幾年,好等個女有個細佬或者細妹陪!」

對《唐人街》一劇寄予厚望的陳展鵬,對劇集一拖再拖而失望。
對《唐人街》一劇寄予厚望的陳展鵬,對劇集一拖再拖而失望。
陳展鵬有一個女兒外,還一心想再追多個B,所以要求TVB狂加人工,結果被TVB出招對付。
陳展鵬有一個女兒外,還一心想再追多個B,所以要求TVB狂加人工,結果被TVB出招對付。

五小生年薪比併

  不少TVB藝人受不了低薪,捱幾年乾脆走人,不過幾位男藝人包括陳豪、馬國明、王浩信、陳展鵬、袁偉豪等密密做,最終捱出頭來。廣告代言、商場活動、加埋進軍內地,成為TVB頭五名最搵錢藝人。

陳豪 3,000萬元

  「TVB師奶殺手」陳豪一向形象討好,加上家好男人形象,一向深受網民同客戶喜愛,除了拍劇、拍廣告、商演,近年其自家品牌咖啡店生意漸上軌道,在疫市下仍然狂接job,絕對是疫市奇葩!有指他前年以3,000萬天價續約TVB成為TVB最高薪藝人!

馬國明 800萬元

  出名是呆萌的乖仔的馬國明,2019年憑着《白色強人》奪得最佳男主角,奮鬥多年終於榮升視帝,唔揀job又聽話密密做,2018年終於儲夠錢2000萬購入太古城複式單位給媽咪,近年廣告亦接唔停手,多job自然身價升,身為TVB 搵錢藝人頭五甲,馬明年薪約800萬!

王浩信 600萬元

  曾經透露捱過艱苦日子,銀行存款長期雙位數,連一碗芝士麵也吃不起的王浩信,在《萬千星輝頒獎典禮2017》中勇奪「最佳男主角」做視帝身價飆升,又跳出了香港市場,進軍內地揾真銀,成為TVB「金蛋」,保守估計年薪達600萬元。

陳展鵬 500萬元

  入行二十八年,陳展鵬做歌手期間,曾不幸地遇上了97金融風暴,試過幾乎零收入,要落地盤做工人賺外快,日收350元。直到2008年加入TVB後,一直拍劇,2016年主演《城寨英雄》後,終於捱出頭,奪得視帝,身價幾級跳,可惜相比起其他男藝人,他明顯少廣告和外快機會,年薪估計500萬元。

袁偉豪 300萬元

袁偉豪是TVB力捧藝人之一,成為一線當旺小生後,2020年和老婆張寶兒結婚,愛情事業兩得意!雖然被標「億萬駙馬」,但袁偉豪為襯得起另一半兼要供樓,肯搏肯捱,儘管疫情下工作減少,但年薪仍然有約300萬元。

原文刊於《星島日報》名人雜誌(逢周日見報)

(左起)王浩信、陳展鵬與陳豪都是TVB當家小生,收入卻有相距。
(左起)王浩信、陳展鵬與陳豪都是TVB當家小生,收入卻有相距。
陳展鵬自《天命》之後,相隔兩年才再有《逆天奇案》推出。
陳展鵬自《天命》之後,相隔兩年才再有《逆天奇案》推出。
馬國明與袁偉豪都係聽教聽話又好用的TVB小生。
馬國明與袁偉豪都係聽教聽話又好用的TVB小生。
由樂易玲穿針引線加入天盟娛樂成為歌手,一圓唱歌夢。
由樂易玲穿針引線加入天盟娛樂成為歌手,一圓唱歌夢。
陳展鵬要求TVB加人工至同黎耀祥看齊。
陳展鵬要求TVB加人工至同黎耀祥看齊。
張振朗擔正做《童時愛上你》,陳展鵬變配角。
張振朗擔正做《童時愛上你》,陳展鵬變配角。

最新回應

關鍵字

相關新聞

熱門文章