【獨家】大讚Do姐夠灑脫最有型 黎芷珊欣賞志偉令公司有士氣
2021-07-15 22:50 
近期TVB嘅訪談節目《單對單》，由黎芷珊訪問因為唔同原因處於單身狀態嘅嘉賓，節目中陳秀珠、黃日華、高海寧爆喊，賺人熱淚！曾獲「最佳節目主持」的黎芷珊再被讚賞，她謙稱自己都單身咗9年，好有經歷同感受去Share！至於眾多單身女性中，芷珊大讚Do姐我行我素最有型！採訪：方騫平 攝影：梁志明 場地：THE STADIUM@觀塘
9年前黎芷珊憑首個訪談節目《最佳男主角》，訪問舊男友鄭伊健、梁朝偉及劉德華等成為焦點，而《單對單》亦深受觀眾喜愛，當中黃日華說到喪偶痛處，大男人都不禁眼濕濕；陳秀珠講起做單親媽媽嘅重擔及高海寧談到人生遺憾事同樣爆喊。
曾搵李佳芯被拒
黎芷珊坦承要搵啲冇掩飾嘅嘉賓，所以個個都真性情、肯講嘢，加上她亦係單身，傾起嚟就更有共鳴：「唔止華哥嗰集好感人，米記(米雪)一直都好樂觀嚟面對另一半患重病，唔覺得咁慘都好有啟發性。」原來芷珊曾搵過李佳芯(Ali)及鄭裕玲都被拒：「唔係個個想喺鏡頭前講自己嘅嘢，呢啲冇得迫，我私下同Do姐有交流，近年佢開朗咗好多，不時煲劇講追星，佢算多情，不過我換畫速度快過佢，呢期佢迷姜濤；我就鍾意內地『小鮮肉』肖戰！其實單身女性唔係外間認定嘅賣剩蔗冇人要，只係有唔同原因保持單身，好似Do姐咁enjoy單身，唔使同另一半交待，做鍾意做嘅嘢，擺明鍾意姜濤又點呀？幾灑脫幾型呀！」另外，她又指𠵱家公司多咗唔同類型節目，大家士氣大增，副總曾志偉仲落手落腳，成日鞭策她度啲新節目。
最新回應