【Juicy叮】首日開工遇黑雨致電HR無人聽 打工仔被責「失蹤」無咗份工

有網民在facebook專頁「奴工處」指，原本首日上班要簽聘書，結果遇上黑雨警告要延遲，十多次致電公司人事部代表卻無人接聽，網民被責怪無故曠工所以拒絕聘用，網民怒不可遏當場大罵該人事部代表。

網民稱，他家住北區而新公司辦公室位處觀塘，6月初應徵後接獲聘請通知，安排6月28日首日上班。

豈料第一日上班兼簽合同就遇上黑色暴雨警告，當事人在路上大塞車，於是照人事部代表的電話號碼，致電公司交代。結果由早上8時半無人聽，當事人起初以為黑雨可能未有人上班，所以由8時50分一直打，打到9時半都是無人接聽，所以他就留言交代聲黑雨情況。然後該公司一直都無電話回撥給他，他還以為黑雨無人抵達公司，否則應該早就有人回撥。

當事人於等到11時05分改發紅雨警告才徒步回公司，結果一抵達公司就被人事部代表召入會議室，劈頭就問 :「點解你今朝no show嘅？」當事人於是解釋 :「今朝黑雨之後我一路都有打過返嚟，但係一直都冇人聽。」

人事部代表卻否認 :「冇喎，我今朝08:30就返到嚟，我枱頭電話睇唔到有miss call同voice mail喎！」當事人堅持 :「冇可能喎，我真係打咗十幾次電話返嚟。」然後當事人更取出手機展示通話紀錄，證明他由8時半打到9時半都無人接聽。

然後人事部代表就不置可否地糊弄過去這個問題。人事部代表推説 :「因為簽約除咗我之外仲有個department head一齊，但係佢去咗食飯，或者你落去食個飯先，跟住你13:30再返上嚟。」

當事人中午過後再上公司，人事部代表又再推説 :「因為而家都過咗半日時間啦，今朝又黑雨，你呢個case就比較難處理，你聽日9點正再上嚟簽過約啦，當你start up時間係聽日啦！」

當事人於是翌日才到公司報到，結果人事部代表卻一改口風 :「X先生，由於你尋日嘅attendance唔係咁理想，而我哋公司係比較著重attendance嘅，閣下咁嘅表現，我哋公司就決定唔同你合作(簽約)啦！」

當事人當場愣住5秒鐘後，「然後我就一輪嘴咁瘋狂X咗佢5分鐘，跟住我就拎袋走人！完全唔畀佢有反駁嘅機會…因為真係谷氣…啖氣吞唔落！」當事人自言，「樂觀啲諗，其實係咪呢場黑雨救咗我？如果真係簽咗約返咗工，而個HR處事作風係咁的話，我諗入去做都有排受」。

有網民留言指是人事部代表有錯，「我覺得係HR要掩飾佢哋8:30之後無人所以先搞走你，由頭到尾你都無見過阿head或其他同事」、「呢啲狀況梗係話新人no show，唔通話自己做漏黑雨安排。」、係hr既問題，正常黑雨唔出席係理所當然（就算你無主動聯絡）

帖文轉載自facebook專頁「奴工處」