【《造星IV》面試】被花姐祖祖「兜口兜面」鬧 黃榕爆喊：真係接受唔到

以全女班為招徠的ViuTV真人騷《全民造星IV》今日進行第三日面試，在芸芸參賽者中，竟然見到一個熟悉的面孔，這個人正是入行接近20年的黃榕！39歲的黃榕身穿露腰配短裙，大晒腹肌及纖腿，她聲稱準備了幾個高難度動作，但其強項之一的一字馬「腿咚」則沒機會展示，問到面試的成績如何？她突然爆喊地說：「我係有啲唔開心，可能因為緊張，我小跳步入場，即刻畀花姐話我好唔尊重場合。仲因為要帶同個人簡介，我就帶咗寫真集，點知另一個評審梁祖堯問我覺得寫真集係性感抑或係色情，話我令佢好尷尬，但我覺得係性感，所以一開始嘅氣氛已經唔係好好。」

黃榕續說：「跟住我跳唱咗JW嘅《逃生門》，點知又畀花姐話我歌唱得唔好、舞又跳得唔好睇，質疑我係咪冇準備；但我真係做足事前準備，加上本身跳咗多年舞。當時我仲忍住喊，以笑面對，點知花姐再話：『你個樣好唔開心，做乜仲笑？』我即忍唔住喊！我知道呢個節目好嚴謹，事前內心都模擬過受抨擊，但實在係超出預計，網上抨擊可以睇完就算，但面對面咁樣畀人話，真係接受唔到！」

黃榕又表示現場評審除了花姐和梁祖堯外，還有許廷鏗，但她表示已不會再想這個比賽了，但也沒後悔，因一向喜歡唱歌跳舞、亦喜歡真人騷、比賽又沒年齡限制，反正疫情下只是留待在家中，故決定一試。