【獨家】陪黑面女友行街被當透明　崔建邦又拖又攬𠱁唔掂謝晒皮

42歲人稱「媾女王」的崔建邦（Amigo）與香港代表劍擊運動員崔浩然胞姊Jessica Vivian Choi拍拖3年多，感情穩定的二人前年傳出婚訊。近日他接受J2節目《Mean Talk》訪問時，除重提10多年前涉打前女友「中巴」鄺敏慧一事外，又直言視Jessica為結婚對象，仲暗示已為結婚做好準備。經一事長一智的Amigo現在對女友呵護備至，日前佢就同女友喺又一城行街，雖然女方黑晒面，但佢都好有耐性又拖又攬力𠱁對方。採訪：譚壹致

雖然近日崔建邦忙於拍攝拳擊比賽節目《Fight盡》，但佢都冇冷落女友。日前晚上8點，《頭條日報》記者發現身穿白色「雞翼袖」背心襯短褲的Amigo，與一身粉紅色One piece披牛仔褸的Jessica，喺又一城拍拖行街街，惟女友全程木無表情，兩人更不時「向左走向右走」分開行，未知Amigo是否激嬲對方呢？當日兩人在首飾店前Window Shopping，望咗一輪，Amigo似乎睇啱心水想買畀女友，正打算走進舖頭之際，Jessica卻完全唔畀面，一個華麗轉身就離開。

火藥味濃
之後，任職英文老師的Jessica走去書店打書釘，在她專心揀英文書時，四肢發達企唔定的Amigo卻於店中周圍兜，忽然好雀躍地攞咗本兒童圖書畀女友睇，結果對方都係冇乜反應，臨走前，搞搞震冇幫襯的Amigo仲拎起一盒玩具係咁睇，唔啱用望吓都好。接着二人到LOG-ON睇寵物用品，他們各自揀了一包狗仔零食，再行多圈便去畀錢；隨後再到超市逛，沿路搭扶手電梯落樓時，見女友仍面燶燶，Amigo即拖手又攬攬𠱁對方，無奈Jessica眼尾都冇望過他，去到超市仲繞晒手，火藥味好重喎。