【獨家】做咗阿媽胸大咗老公變熱情 熊黛林40歲重出江湖罕談城城
2021-07-06 23:40
熊黛林(Lynn)宣布重出江湖,上周五以醫學美容代言人身份出席開幕活動,穿上大Show曲線的長裙,靚爆全場。40歲嘅Lynn興奮自爆閨房秘密:「老公(郭可頌)見我復工後咁索都熱情咗好多呀!」「幸福人妻」經常喺社交平台放閃,仲不時同舊愛郭富城前後腳出Post,Lynn首次開腔解密:「我係被迫嘅。」!採訪:方騫平 攝影:譚壹致 場地:perFACE@旺角朗豪坊
熊黛林做咗醫學美容代言人10年,她強調唔係從酬金出發,最重要係幫到手扮靚:「我生完孖女後水腫得好緊要,佢哋用咗一個月時間同我執返靚,𠵱家都有Keep住做Treatment。」Lynn強調只要靚,接受女仔做醫學美容:「靚有乜罪呀?人工咪人工囉!暫時我做機就夠。」至於會否考慮隆胸?她耍手大笑:「我覺得唔使,否則好難搵衫,而且做咗媽咪後,升咗去34C。經理人經已投訴我胸大手腳瘦,身形不成比例好難搞!」問到最有滿足感係咪老公?她偷笑說:「我返去問吓佢!」
做全職媽媽曾經迷失
對於靚嘅定義,熊黛林強調唔係單睇五官有幾精緻,最緊要皮膚好firm,內裏要有信心,她自信說:「老公眼中我係最靚,如果佢覺得有第二個比我靚就大鑊喇!我老公唔會𥄫女,平時我喺佢隔離應該係最突出一個,因為我夠高!」她又分享經驗之談,話如果一個女仔成日擔心呢樣嗰樣就會好唔快樂,做女仔要增值自己,要對自己有信心:「其實我生完BB,出返嚟做嘢後變得更有信心,可能有咗經歷,能散發魅力,最重要係出嚟見人要打扮,唔可以再咁hea,前兩年囡囡好黐身,我hea到唔化妝,求其着條牛仔褲就出街,呢段時間有啲迷失,直至𠵱家着返靚衫,成個人真係唔同晒。」變返「索爆人妻」,她開心說:「老公𠵱家熱情咗好多,我見到佢眼神,感覺都唔同晒,所以女人一定要做嘢。」
![撞post Box 1
2015年12月15日
熊黛林Post情侶鞋留言「幸福就在身邊,祝福大家」;當晚郭富城喺車內拖實方媛,正式公開Moka身份。](https://image.stheadline.com/f/332p0/0x0/100/none/0a9a68d027bbf537c2b014a0ad8b34f9/stheadline/inewsmedia/20210706/_2021070623591827424.jpg)
![撞post Box 2
2020年年8月7日
城城出post補祝太太生日,仲加句幸福快樂;Lynn就上載兩張單人靚相,派心心留言「我的眼中只有你」。](https://image.stheadline.com/f/332p0/0x0/100/none/1a5a9c2b43a63615ef1f1176bb5c3430/stheadline/inewsmedia/20210706/_2021070623591964995.jpg)
拒談苟芸慧婚變傳聞
Lynn同舊愛城城多次前後腳在社交平台放閃成為熱話,Lynn對此開腔解畫:「識我嘅人都知道我好懶,係公司要我出㗎!有時公司見我好耐都冇出過嘢咪叫我出吓,咁有啲固定日子,好似BB生日又要出,真係避無可避。」提到經常同城城前後腳出post,她說不知情:「唔知喎,我出咗post就算,唔會睇返。」另外,當年被指介入做「第三者」嘅苟芸慧傳出婚變,Lynn迴避敏感問題,只說:「唔關我事呀!」
最新回應