開慈善線上Show目標幫十個組織 瑪姬首場邀請龔柯允做嘉賓

瑪姬的慈善音樂企劃《瑪姬 Max Your Love 慈善音樂會》正式展開，她每場都會邀請嘉賓好友一齊 jam 歌，並聯繫一個慈善組織作為受惠機構，鼓勵觀眾於線上觀看同時慷慨解囊，所籌得的善款將不扣除成本，全數撥捐受惠機構。

前晚（7月4日）首場邀請到曾參加《全民造星III》的龔柯允(Karen)擔任嘉賓，兩人第一次 jam 歌，瑪姬坦言「Karen係公認有靚聲、有歌藝嘅歌手，夠膽邀請佢做嘉賓簡直係對自己嘅挑戰。」而Karen亦表示十分欣賞瑪姬出心出力行善，「瑪姬完全唔係為自己嘅fame（名氣）去做呢件事，而係落手落腳去搵受惠機構，呼籲大家去幫助社會上有需要嘅人，其實理念同我唱歌嘅初心一樣，都係想用歌聲發放正能量，所以咁有意義嘅事我一定要support（支持）。」

兩人結緣於兩個月前的 TVB《勁歌金曲》，當時瑪姬以音樂導賞員身份點評龔柯允現場演繹的新歌《一轉眼》，兩人的互動在網上大獲好評，之後相約晚餐期間，瑪姬提起自己正籌備慈善音樂會，因而促成今次合作。


瑪姬有感這兩年社會氣氛不好，希望能夠略盡棉力，做點對社會有益的事，「其實自從疫情開始，好多歌手朋友都舉行線上音樂會，我自己都主辦同參與過好幾個，但係次次好開心咁唱完一晚live，第二朝瞓醒就好似發咗場夢咁，好似無事發生過一樣。咁我諗反正都係唱，不如舉行一系列嘅慈善音樂會，鼓勵善心人士一邊聽 live、一邊做善事，咁咪仲有意義。」

防止虐待兒童會是今次慈善音樂會的唯一受惠機構，瑪姬與龔柯允更刻意配襯紅白造型配合慈善機構官方顏色。而當晚籌得款項用於協助促進兒童全面成長及發展，推廣一個關懷及無暴力的環境。瑪姬更透露慈善音樂會海報一見街，即日已經有三十多位善長人翁留言登記捐款，「真係好感激各位善長咁有心，未開show已經籌到接近八千蚊，雖然對受惠機構嚟講可能係細數目，但係對我而言絕對係打咗支強心針，始終第一次一腳踢去籌備慈善音樂會，起初都好擔心一蚊都籌唔到，唔知點交代畀受惠機構，真係要代一眾受惠兒童多謝各位哥哥姐姐。」瑪姬揚言希望能夠一個月舉行一次，「目標係可以為十個慈善組織籌款，用歌聲幫助社會上有需要的人。」