【獨家】直擊忙爆大律師人妻生活　朱千雪收工趕買壽司等老公接返歸

上周一（28日）踏入33歲的朱千雪自前年下嫁青梅竹馬的醫生男友吳昆倫（Justin）後，便淡出幕前修讀法律博士課程，去年9月更正式獲聘成為大律師。上月難得現身公開活動的她，透露做人妻後廚藝大躍進，識煲湯仲識蒸水蛋。早前《頭條日報》記者在銅鑼灣撞到剛放工的千雪BB，一身全黑OL Look的她一抽二褦趕去超市買壽司，然後急急腳行出商場外等老公接返歸。採訪：梁志明

2012年度港姐競選首次玩全民票選三甲，獲外界視為大熱的朱千雪最終因冧Server，輸畀冠軍張名雅及亞軍黃心穎，雖然屈居季軍，但又Pure又True的她卻獲網民封為「民選冠軍」。美貌與智慧並重的千雪BB，早年重返校園自我增值，去年終加入張健利大律師行（Denis Chang's Chambers），成為旗下大律師。身為在職人妻的她跟普通打工仔一樣，要處理法律事務又要照顧家庭，日前晚上近7點，穿全黑套裝、化上淡妝的千雪BB一收工，就挽住大手袋兼孭住裝滿嘢的環保袋，殺落時代廣場citysuper買餸。

壽司當晚餐
可能見太攰又或者太忙冇時間煮飯，千雪BB最終擸走一盒288蚊的壽司拼盤，及兩小盒手卷就去畀錢，其間她一邊等職員「嘟」嘢、一邊拎住手機傾公事，其間一臉嚴肅皺晒眉。之後，千雪BB抽住大袋晚餐步出商場，見外面雨勢頗大，同好多市民一齊企喺門口避雨，再拎出手機Text老公自己位置，惟撳撳吓機卻一度跣手，好彩千雪BB身手敏捷及時捉實。大約等了5分鐘，Justin終於駕着私家車駛至，千雪BB即急急腳登上坐駕離開，上車後見到記者在場，她亦Nice爆向鏡頭揮手道別。