【鰂魚涌公園槍殺案】中槍二舅父：被告攞住手槍好冷酷

2018年6月女子詹心桀疑於鰂魚涌公園槍殺姨舅，造成2死2傷，涉案被控2項謀殺及2項有意圖而射擊罪名。案件今日於高等法院續審，案中重傷的詹心桀二舅父續出庭作供，憶述案發時眾人在公園涼亭中閒談，「抬頭望見佢（詹心桀）遞起隻手，攞住手槍，個表情好冷酷，瞄準住開槍，槍聲、佢表情我都記得，成世人第一次聽到槍聲，3年來我都冇忘記呢樣嘢」，言罷不禁低頭飲泣。

控方由律政司高級助理刑事檢控專員黎劍華代表，被告詹心桀由資深大律師蔡維邦代表。詹心桀二舅父詹前駒續作供指眾人用膳後1時半左右，詹心桀問眾人「可唔可以講多一陣？」眾人遂應其建議到公園，各兄弟姊妹各自在涼亭下長椅坐下，詹心桀則站在涼亭邊緣，閒談一輪武術、運動之後「都冇乜再講」，其姊妹均曾提議離開，惟詹心桀「不斷話『等一等等一等』」，眾人感到不耐煩，均稱「你究竟有咩嘢想講呀，諗唔到返去諗諗先啦」。

3時許詹前駒或許受槍聲刺激，「抬頭望見佢（詹心桀）遞起隻手，攞住手槍，個表情好冷酷，瞄準住開槍，槍聲、佢表情我都記得，成世人第一次聽到槍聲，3年來我都冇忘記呢樣嘢」，言罷不禁低頭飲泣，惟「唔係好記得1次定2次（槍聲），『頂籠』2次，聽得好清楚」。詹前駒續指詹心桀「開完槍之後再行近我嗰到面向我睇住我，我當時已經中咗槍，掩住手，手流好多血，痛唔係好痛，不過血係咁流，喘唔到氣，好本能打側咗靠住條柱，對住佢講『你點解可以噉樣對待我哋？』」因為數十年來一直非常支持其家庭經濟，詹心桀母親去世後，「全家都好支持佢（詹心桀）」，所以「好震驚、好傷心」。詹心桀當時沒有回應，望了詹前駒一下，便走向太古城。

詹前駒續指當時呼吸困難，用手掩住自己傷口，見到死者詹鎮基躺在地上，「頭有個窿，有血流出來」，詹小慧在旁叫喚「阿哥你醒呀你醒呀」他遂前往看顧另一名死者詹少芬。詹前駒坐在詹少芬側邊，見到頭上有一些血跡，遂用手擦掉，「點知入面重有血，再大力啲抹，就見到個窿不斷有血流出來」，其後氣力不繼，坐倒在一旁。

詹前駒又指自己康復後手臂可如常活動，心口卻或因子彈曾穿過2條肋骨，手術後發現肋骨折斷，深呼吸時仍會隱隱作痛。詹前駒否認死者詹少芬生前曾對詹心桀說「我點知你阿媽幾時死」或「你阿媽唔死都死咗，你阻住全世界都冇用」，因為詹少芬為人仁慈，又非常關心詹心桀。

44歲被告詹心桀無報稱職業，被控於2018年6月26日，在鰂魚涌公園內謀殺其二姨詹少芬(80歲)及其四舅父詹鎮基(62歲)，及意圖使二舅父詹前駒(75歲)及三姨詹小慧(63歲)身體受嚴重傷害而向2人射擊。

法庭記者：陳子豪

建立時間：13:10
更新時間：14:18