【獨家】富二代拍劇賣Bagel忙得快樂　伍樂怡自認捱得想拍打戲

有「仙氣李若彤」之稱的落選港姐伍樂怡（Kelly），繼早年創立運動服裝品牌後，去年10月再開設網店賣自家Bagel，結果疫市下愈做愈大，今年3月起於大型商場設置Pop-up shop。雖然身為千金小姐，但Kelly自問好捱得，絕不會為打理生意而放棄幕前事業，搏盡的她仲想做打女𠻹！撰文：黎寶倫　攝影：張詠森　場地：Bageliciouz

從藝訓班畢業後，伍樂怡主力為兒童節目《Think Big天地》任主持，直至近年終獲公司力捧劇接劇，更首次擔正TVB新劇《青春不要臉》。要兼顧幕前工作及生意，Kelly卻認為好有挑戰性，「我係停唔到落嚟，一有時間就會諗做啲咩好，Bagel就好耐之前同媽咪一齊Plan，因為我好鍾意食Bagel，由加拿大返嚟發現香港真係唔多選擇，所以開始研究食譜，都搞咗半年，我好嘴刁，有少少差錯就要改。（男友約食飯好挑剔？）又唔會，喺出邊咩都好食，食飯唔係真係食飯，係大家開開心心。」並謂也有跟經營內衣生意的父親，以及打理家族生意的富二代男友Fred，請教生意經。

視張可頤為學習對象
當要二選一時，Kelly坦言會揀番正職拍劇，「好感恩公司畀好多機會，大家都話要好好把握，好彩遇到好監製、團隊，我覺得係好嘅開始。（戲份重壓力大？）一定有，畀咗你就要諗每個細節點做好。」她又否認富家女玩玩吓，更以偶像張可頤為學習對象，「我好執着，決定要做嘅嘢就一定要做到足，希望可以挑戰打鬥戲，我好捱得㗎！」