【獨家】女婿駕車接送硬食「牛肉乾」　余安安抄牌等太耐面燶燶

61歲余安安早前榮升婆婆，任職律師的大女李文琪（Marcia）喜獲麟兒，孫仔Declan非常得意，新任婆婆直言抱到唔捨得放手。雖然家陣眼中只有個孫，但安安姐都冇忽略大女，早前仲買了不少補品給對方，日前她又再出動落銅鑼灣掃貨，點知Standby接送外母大人的女婿Jeremy就勁唔好彩，硬食「牛肉乾」！採訪：梁志明

身穿黑色連身裙、戴黑超的余安安，日前單拖落銅鑼灣Shopping，見她抽住一大袋戰利品，未知是否買嘢送畀孫仔Declan呢？逛至下午4點半，安安姐便步行到波斯富街，並登上一架泊在路邊的白色私家車，原來其「柴可夫」正是女婿Jeremy，同行坐在副駕駛座的仲有安安姐的囡囡李文琪。

安安姐心繫乖孫
不過安安姐行近座駕時，就發現一名交通警正在抄牌中，望一望地上一條黃色實線，再睇睇個鐘，相信車輛剛好在限制時段內停泊，加上司機在場，已涉「司機不遵守交通規則」，需罰款450港元。安安姐上車後即脫下黑超和口罩，並將口罩掛在窗邊，其間一直望出窗外，但抄牌抄足3分鐘都未搞掂，她一臉不耐煩，阻住佢返屋企湊孫，明白點解個樣唔多高興嘅。