疫情下重整思想生活變得樸實 宣萱深信有緣迫到埋嚟都擋唔住

宣萱今日以大使身份出席醫務所活動，代癌症病人答謝腫瘤科醫生，她表示近日趁拍戲和拍廣告前忙於清理家居，她要斷捨離，狠狠地清了共3大個垃圾袋，當中的電器及衣物贈予有需要的人或捐給救世軍，亦有不少飾物送贈深水埗擺檔攤的婆婆。不過過往喺台慶着過嘅戰衣及百多對高踭鞋都唔捨得掉，試過幾次重穿高踭鞋，因為放得太耐，搞到行行吓甩踭。問執拾舊物可有勾起回憶？她笑說：「睇返奇怪點解條裙23腰咁幼都着得落？𠵱家腰圍幾多？唔好提...幾多吋囉！」

問空餘時間可有男士邀約？宣萱直言約她也不去：「冇啦，呢年幾我都冇出街食飯，唔係驚自己中，而係驚同場有人有事我就要隔離。」她否認有好多朋友介紹男仔她識：「疫情下呢年幾令我重整思想，個人都放鬆晒，只要有基本生活就夠，搵另一半隨緣啦！因為呢啲迫到埋嚟都擋唔住。」