被Anson Lo搞到尷尬潮熱　Serrini：佢吸乾晒我啲元氣

Serrini昨晚完成《SERRINI "I'M (NOT) FINE, THX.》演唱會尾場後受訪，提到與嘉賓Anson Lo（盧瀚霆）大跳貼身舞，她即High爆說：「佢好似歐洲古堡啲吸血鬼，將我個心俘虜，吸乾晒我啲元氣，令我唱歌都唔夠中氣！（為何不敢摸對方？）好尷尬呀！見到佢咁靚仔會怕醜、潮熱、又唔知摸唔摸得。不過我都冇後悔，保持社交距離，再見面都唔會尷尬。」

對於來睇騷的林家謙被迫臨時上台表演，並要求她「傍水」，Serrini笑指：「同佢只係螢幕朋友嚟，佢已經攞咗免費飛睇騷，好可惡囉。唔會再畀報酬，年輕人要有進步空間。」演出期間她分別向兩位觀眾吻手背及掌摑，Serrini稱其實兩人都是自己的朋友。

問到下一站是否紅館？Serrini表示：「未有搞Part 3嘅計劃，只係想喺屋企一日做兩個Spa，好好休息，同埋同一班樂手打邊爐。」至於入紙紅館就隨緣，她續道：「仲有好多場地想試吓開騷，例如沙灘、泳池，或者喺維港中心起個浮台，我喺躉船上面演唱，仲可以改個Concert名做『巨躉音樂會』！」