粉絲送星星好驚喜陳卓賢同家人慶生女友冇份

2021-06-16 17:45

MIRROR成員陳卓賢（Ian）與YouTube頻道「小薯茄」成員麗英今日出席米線餐廳活動，大會送上米線蛋糕，為上周三（9日）28歲生日的Ian補祝。Ian透露今年吃了大量生日蛋糕：「生日正日要開工，當日食咗4個蛋糕，暫時加埋食咗起碼10個，要運動Keep Fit！」談到有Fans送上以他命名的星星，Ian坦言好驚喜：「送星星好似愛情電影啲橋段，估唔到會發生喺自己身上。除咗有證書，都可以上網睇星星，睇相已經好靚，可能我要買支天文望遠鏡，開始學觀星，哈哈！」

問到女友盧慧敏（Amy）有何表示？Ian指：「我唔太著重形式同禮物，講句生日快樂都夠。」他又表示與家人一起慶生，但避談沒有帶Amy回家的原因：「我同屋企人都只係食飯慶祝，媽咪生日同我差幾日，好多謝佢辛苦生我出嚟！（Amy有冇融入家中賀壽？）冇呀！（點解呀？）遲啲時機成熟再同大家報告啦！」

近日熱播的《調教你MIRROR》中，Ian素顏上陣，他自言沒有心理障礙：「唔使化妝仲開心，同埋以前出國比賽都係輕裝上陣，今次入Camp 12日帶一個背嚢都夠。」昨晚的《調教》講到MIRROR勸「私追」Fans離開，Ian慶幸未試過被尾隨回家：「多謝大家尊重同保持距離，當日都係因為影響到拍攝，MIRROR先決定公開呼籲。」