被指穿「辱華」品牌遭網民抨擊 莫文蔚認疏忽惹禍：呢個係好教訓

莫文蔚（Karen）昨晚完成三場《絕色世界巡迴演唱會》香港站，她事後接受訪問時笑言還有力氣繼續唱，但開3場剛剛好，貴精不貴多。問會否因不捨而收回不在紅館表演的宣言？Karen表示只是換個方式：「唔會唔表演，只係唔再係Tour形式。人生下半場可以有新嘗試，而且往後可能有更大場地，我唔做大型演唱會，可以做巨型演唱會呀！」

對於請到張學友做嘉賓，Karen指是碌盡人情卡，她當時親自提出邀請，對方一口答應。提到在演唱會大晒兩人昔日合照，是否花盡時間「尋寶」翻出雜誌？Karen笑稱：「一早已放喺牀頭，紀念出道20周年展覽嗰陣已經搵到，當時已好期待同學友合唱。」至於老公Johannes也上台表演，Karen冧爆大讚對方鋼琴勁，那麼要怎樣報答老公？她表示：「交番個人畀佢囉！準備休息，今次用咗好多想法同精力，要唞一唞。（畀自己幾分？）當然係滿分，舞台上大家都使出200%精力。（全程只有少少哽咽好堅強。）因為我比較少唱《HEY! 如果⋯⋯》呢首歌，第一次公開唱，歌詞又有離別感覺，係好感動。」

Karen近日推出新歌《婦女新知2021》MV，當中的服裝被指是「辱華」品牌而遭內地網民抨擊，造型師馬天佑也慘變箭靶，她回應：「一直將表演放喺第一位，清楚了解到自己有疏忽。半年來太過專注演唱會，平時着衫又唔係好理，唔太在意品牌。不過被發現都代表要注意，以前造型師覺得適合就會着，呢個係好教訓，再細微都要自己處理。（馬天佑也被鬧爆？）團隊係有責任，但冇人想發生。（下架MV會重新上架？）希望做番好先。」